Rohit Pawar : महाभागालाच NCP पक्ष ताब्यात घ्यायचा होता, तटकरेंकडून अप्रत्यक्ष रोहित पवारांचा डोमकावळा म्हणून उल्लेख

Sunil Tatkare reply to Rohit Pawar allegations : "रोहित पवार यांनी स्वतःच्या पक्षात काय सुरू आहे, ते आधी पाहावे. त्यांना ५० माणसेही जोडता आली नाहीत, त्यामुळे त्यांनी आमच्या पक्षाबद्दल बोलणे थांबवावे," असा इशारा सुनील तटकरे यांनी दिला. ते मुंबईत आयोजित पत्रकार परिषदेत बोलत होते. रोहित पवार यांनी केलेल्या आरोपांना त्यांनी यावेळी सडेतोड उत्तर दिले. तटकरे यांनी रोहित पवार यांचा उल्लेख 'महाभाग' आणि 'डोमकावळा' असा केला. सुनील तटकरे यांनी राष्ट्रवादी काँग्रेस पक्षाच्या घटनेत बदल करून पक्ष ताब्यात घेण्याचा प्रयत्न केला, असा गंभीर आरोप रोहित पवार यांनी केला होता. या आरोपाचा तटकरेंनी समाचार घेतला.

तटकरे म्हणाले, "काही 'डोमकावळे' आमच्या पक्षात डोकावत आहेत. उलट, पक्ष ताब्यात घेण्याची घाई त्यांचाच (रोहित पवार) प्रयत्न होता. दादांच्या (अजित पवार) अपघातानंतर काय झाले, याची सर्व माहिती माझ्याकडे आहे. या महाभागालाच राष्ट्रवादी पक्ष ताब्यात घ्यायचा होता." तसेच, सुनेत्रा पवार, जय पवार आणि पार्थ पवार यांच्या पाठीशी पक्ष खंबीरपणे उभा आहे; मात्र वहिनी अध्यक्ष झाल्यापासून अनेक 'डोमकावळे' पक्षात डोकावत आहेत, असेही ते म्हणाले.

"अजित पवार सोबत असताना अनेक कटकारस्थाने केली गेली. अजित पवारांनी पक्ष चोरला, असे ते म्हणत होते, पण प्रत्यक्षात त्यांनाच पक्ष बळकावायचा होता. २०१४ पासून मला लक्ष्य केले जात आहे. केवळ प्रसिद्धी मिळवण्यासाठी रोहित पवार माझ्यावर आरोप करत आहेत, त्यामुळे त्यांनी पक्षावर बोलणे थांबवावे," असे टीकास्त्र सुनील तटकरे यांनी सोडले. गेल्या काही दिवसांपासून रोहित पवार यांच्याकडून तटकरे आणि प्रफुल्ल पटेल यांच्यावर सातत्याने गंभीर आरोप करण्यात येत आहेत.

अजित पवार यांच्या दुर्दैवी निधनानंतर काही 'डोमकावळे' आमच्या पक्षात लक्ष घालण्याचे काम करत आहेत. रोहित पवार यांनी आधी आपल्या पक्षात काय सुरू आहे, ते पाहावे, असा टोला सुनील तटकरे यांनी लगावला. काहींना आता आमच्या पक्षाबद्दल खूपच काळजी वाटू लागली आहे. दादा असतानाही मला अनेकवेळा लक्ष्य (Target) केले गेले आणि २०१४ नंतर तर हे प्रमाण मोठ्या प्रमाणावर वाढले. दादांचा माझ्यावर पूर्ण विश्वास होता आणि आजही आहे, म्हणूनच मला लक्ष्य केले जात आहे, असे तटकरे म्हणाले.

देवगिरी बंगल्यावर झालेल्या संध्याकाळच्या बैठकीला मी उपस्थित होतो. रायगड, कोल्हापूर आणि पुणे जिल्हा परिषदेत भविष्यात काय करायचे आहे, याबद्दल मी माझी स्पष्ट भूमिका मांडली. तसेच 'डिलिमिटेशन' (मतदारसंघ पुनर्रचना) आणि महिला आरक्षण अंमलबजावणी यावरही सविस्तर चर्चा झाली. या बैठकीला सर्व आमदार आणि खासदार उपस्थित होते, असेही तटकरे म्हणाले.