Thane Crime News: अध्यक्षांसमोर स्वत: उपस्थित राहून उत्तर द्या ; ठाणे पोलिसांना महिला आयोगाचा आदेश, काय आहे प्रकरण? जाणून घ्या

Thane Crime News

ठाणे येथील तरुणीवर जीवघेणा हल्ला झाला होता. या प्रकरणाची महिला आयोगाने दखल घेतली आहे. ठाणे पोलिसांनी या प्रकरणात आतापर्यंत केलेल्या कारवाईचा संपूर्ण अहवाल महिला आयोगाच्या अध्यक्षांसमक्ष उपस्थित राहून सादर करण्याचे आदेश आज राज्य महिला आयोगाने दिले आहेत. ठाण्यात एका तरुणाने मित्रांच्या मदतीने तरुणीला जीवे मारण्याचा प्रयत्न केला होता.

तरुणीवर झालेल्या या हल्ल्यानंतर दिनांक १४ डिसेंबर २०२३ रोजी पीडित तरुणीच्या इंस्टाग्राम पोस्टद्वारे तिच्यावरील हल्ल्याची घटना उघडकीस आली होती. सदर प्रकरणाची राज्य महिला आयोगाने दखल घेत दि. १५ डिसेंबर २०२३ रोजी ठाणे पोलिसांना याबाबत तात्काळ कार्यवाही करण्याचे निर्देश दिले होते. आयोगाच्या निर्देशानंतर ठाणे पोलिसांनी याप्रकरणी गुन्हा दाखल केला होता. मात्र गुन्हा नोंद करून आठ दिवस झाले आहेत.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

आता पोलिसांनी गेल्या आठ दिवसात याप्रकरणी केलेल्या तपासाबाबत महिला आयोगासमोर व्यक्तिशः उपस्थित राहून अहवाल सादर करावा असे निर्देश आयोगाने दिले आहेत. वरिष्ठ पोलीस निरीक्षक कासारवडवली यांनी प्रकरणाचा तपास करणाऱ्या अधिकाऱ्यांसह वस्तुनिष्ठ अहवाल दि. २२ डिसेंबर २०२३ रोजी दु. ३ वा. महाराष्ट्र राज्य महिला आयोग कार्यालयात मांडण्याच्या सूचना करण्यात आल्या आहेत. त्यामुळे महिला आयोगाला पोलीस काय उत्तर देणार याकडे लक्ष दिलं आहे.