एसटी कर्मचाऱ्यांनी पावत्यांची होळी करून दिला संघटनेचा राजीनामा

अकोला : एसटी कर्मचाऱ्यांनी आज कर्मचाऱ्यांच्या संघटनांच्या पावत्यांची होळी करीत संघटनेच्या पदाचा राजीनामा दिला आहे. हा प्रकार आगार क्रमांक एक येथे कर्मचाऱ्यांनी केला आहे. कर्मचारी संघटना राज्य सरकारशी भांडू शकत नसल्याच्या कारणावरून त्यांनी संघटनेच्या विरोधात रोष व्यक्त करीत हा निर्णय घेतला आहे. तत्पूर्वी सिटी कोतवाली पोलिसांनी कर्मचाऱ्यांना होळी करण्यापासून मज्जाव केला. यावेळी कर्मचारी आणि पोलिस यांच्यात शाब्दिक वाद झाला.

हे देखील पहा :

त्यानंतर छोट्या स्वरूपात कर्मचाऱ्यांनी कागदाची होळी केली. या आंदोलनात 34 कर्मचाऱ्यांनी विविध संघटनेचे राजीनामे दिले आहे. राज्यातील एसटी कर्मचारी संघटना गेल्या महिन्याभरापासून कर्मचाऱ्यांच्या लढ्यात सहभागी झाल्या नाही. या संघटना कर्मचाऱ्यांच्या असताना त्यांना या आंदोलनात वाऱ्यावर सोडले आहे. यामुळे आगार क्रमांक एक येथे एसटी कर्मचाऱ्यांनी विविध संघटनांचे राजीनामे देऊन त्यांच्या पावत्यांची होळी केली.

दरम्यान, एसटी कर्मचाऱ्यांच्या होळी आंदोलनापूर्वी सिटी कोतवाली पोलिसांनी कर्मचाऱ्यांचे हे आंदोलन उधळून लावले. होळी साठी आणलेली लाकडे पोलिसांनी उचलून बाहेर फेकली. यामुळे कर्मचाऱ्यांमध्ये नाराजी निर्माण झाली. त्यांची पोलिसांसोबत शाब्दिक बाचाबाची झाली. त्यानंतर मात्र कर्मचाऱ्यांनी नियोजित स्थळी छोट्या स्वरूपात आंदोलन केले.

Edited By : Krushnarav Sathe