Maharashtra Politics: विधानसभेत 'दादा'गिरी चालणार? अजित गटाला विधानसभेत हव्यात 80-90 जागा

विनोद पाटील, साम टीव्ही, प्रतिनिधी

लोकसभेच्या जागावाटपात तोंड पोळलेल्या अजित पवार गटानं ऑक्टोबरमध्ये होणाऱ्या विधानसभेसाठी आतापासूनच जोरदार तयारी केलीय. अजित पवारांच्या राष्ट्रवादीनं लोकसभा निवडणुकीचा निकाल लागण्यापूर्वीच विधानसभेच्या जागावाटपाची रणनीती आखलीय.

नाशिक लोकसभा उमेदवारीच्या स्पर्धेतून माघार घ्यावी लागलेले ज्येष्ठ मंत्री छगन भुजबळांनी जाहीरपणे विधानसभेसाठी 80 ते 90 जागांची मागणी केलीय. सत्तेत सहभागी होताना तसा शब्द दिल्याचा दावाही भुजबळ करायला विसरले नाहीत. जे लोकसभेत झाले ते विधानसभेत होऊ देऊ नका, अशी परखड सूचनाही त्यांनी अजित पवार आणि प्रफुल्ल पटेलांना केली. अन्न व नागरी पुरवठामंत्री छगन भुजबळ म्हणाले आहेत की, ''लोकसभेत जागावाटपावरून जी खटपट झाली तशी विधानसभेत नको.''

भुजबळांनी जाहीर भाषणात ही भूमिका मांडल्यामुळे पटेलांनाही कार्यकर्त्यांसमोर जे लोकसभेत घडलं ते विधानसभेत घडणार नाही, असं आश्वासन द्यावं लागलं. प्रफुल्ल पटेल की, ''जे लोकसभेत झालं ते विधानसभेत होणार नाही, याची खबरदारी घेऊ.''

महायुतीतला सर्वात मोठा भाऊ असलेल्या भाजपनं मित्रांचा जागावाटपात सन्मान राखण्याचं आश्वासन दिलंय. मात्र भाजप हा सर्वात मोठा पक्ष आहे, हे सांगायलाही उपमुख्यमंत्री देवेंद्र फडणवीस विसरले नाहीत. या मुद्द्यावर बोलताना देवेंद्र फडणवीस म्हणाले आहेत की, ''भाजप सर्वात मोठा पक्ष. मित्रांचा सन्मान राखला जाईल.''

लोकसभेसाठी अजित पवारांना अक्षरशा मित्र पक्षांकडून उमेदवार आयात करावे लागले. स्वपक्षातले केवळ दोनच उमेदवार निवडणुकीच्या मैदानात आहेत. दरम्यान, लोकसभा निवडणुकीत महायुतीतल्या जागावाटपाच्या वाटाघाटीत मोठी माघार घ्यावी लागल्याची सल अजूनही अजित पवार गटाला बोचतेय. त्यामुळे अजित पवार गटानं आतापासूनच आपलं संपूर्ण लक्ष विधानसभेवर केंद्रीत केलेलं दिसतं. मात्र महायुतीतला सर्वात मोठा भाऊ सर्व्यात लहान भावाला विधानसभेत तरी सन्मान देणार का याचीच उत्सुकता आहे.