पश्चिम महाराष्ट्रात शिंदेंना भाजपचा धक्का, आमदाराच्या भावासह ४० पदाधिकाऱ्यांचा शिवसेनेला जय महाराष्ट्र!

आगामी स्थानिक स्वराज्य संस्थांच्या निवडणुकांना अवघे काही महिने शिल्लक असताना राजकीय हालचालींना वेग आला आहे. तसेच फोडाफोडीचं राजकारण आणि पक्षप्रवेश होताना दिसत आहे. अशातच महायुतीमध्ये नाराज असलेले शिवसेना शिंदे गटाचे आमदार तानाजी सावंत यांच्या बंधूंनी शिवसेनेला जय महाराष्ट्र करत भाजपचं कमळ हाती घेण्याचं निश्चित केलं आहे. दोन दिवसांत भाजपमध्ये प्रवेश करणार असून, त्यांच्यासह अनेक समर्थक प्रवेश करणार आहेत.

सोलापूरात शिंदेंच्या शिवसेनेचं संख्याबळ कमी आहे. शिंदेंचं सोलापुरात एकही आमदार नाही. दरम्यान, आगामी स्थानिक स्वराज्य संस्थांच्या निवडणुकांच्या पार्श्वभूमीवर शिवाजी सावंत यांनी शिदेंची साथ सोडल्यामुळे शिंदे गटाला जबरदस्त धक्का बसला आहे. दोन दिवसांत त्यांचा भाजपात पक्षप्रवेश होणार आहे.

शिवाजी सावंत यांनी मुख्यमंत्री देवेंद्र फडणवीस यांची भेट घेतली. नंतर त्यांनी शिवसेना पदाधिकाऱ्यांशी चर्चा करून हा निर्णय घेतला. मुख्यमंत्री देवेंद्र फडणवीस यांच्या उपस्थितीत दोन दिवसात शिवाजी सावंत, माजी उपमहापौर दिलीप कोल्हे यांच्यासह शिवसेना पदाधिकारी, युवासेना, महिला आघाडीचे पदाधिकारी भाजप पक्षात प्रवेश करणार आहेत.

जिल्ह्यातील शिवसेना शिंदे गटात अंतर्गत बंडाळी कंटाळून शिवाजी सावंतांनी हा निर्णय घेतला. त्यांच्यासह ४० पदाधिकाऱ्यांनी शिवसेना शिंदे गटाचा राजीनामा दिला. अंतर्गत गटबाजीचा मोठा फटका शिवसेना शिंदे गटाला बसला असून, आगामी सोलापूर महानगरपालिका, पंचायत आणि झेडपी निवडणुकीच्या पार्श्वभूमीवर भाजपाची ताकद वाढली आहे.