Solapur Politics News: राज्यात एकीकडे राजकीय घडामोडींना वेग आला असताना दुसरीकडे सोलापुरातून एक मोठी बातमी समोर आली आहे. सोलापूरमध्ये (Solapur News) भाजपला मोठं खिंडार पडलं आहे. भाजपचे ४ माजी नगरसेवकांनी भाजपला रामराम ठोकला आहे. हे चारही नगरसेवक तेलंगणाचे मुख्यमंत्री के. चंद्रशेखर यांच्या भारत राष्ट्र समिती (बीआरएस) पक्षात प्रवेश करणार असल्याच्या चर्चा आहेत.
भाजपचे (BJP) दिवंगत नेते ,माजी खासदार लिंगराज वल्याळ यांचे पुत्र,माजी नगरसेवक नागेश वल्याळ तसेच संतोष भोसले,राजश्री चव्हाण आणि जुगनबाई आंबेवाले यांनी भाजपचे शहराध्यक्ष विक्रम देशमुख आणि प्रदेशाध्यक्ष चंद्रशेखर बावनकुळे यांच्याकडे पक्ष सदस्यत्वाचे राजीनामे पाठविले आहेत.
विशेष बाब म्हणजे काही दिवसांपूर्वी तेलंगणाचे मुख्यमंत्री के. चंद्रशेखर राव हे महाराष्ट्राच्या दौऱ्यावर आल्यानंतर त्यांनी आवर्जून नागेश वल्याळ यांच्या घरी जाऊन भेट दिली होती. त्यावेळेसच नागेश वल्याळ यांच्या बीआरएस मध्ये प्रवेश करण्याच्या चर्चेला उधाण आलं होतं.
अखेर आता नागेश वल्याळ यांच्यासह भाजपच्या ४ माजी नगरसेवकांनी भाजप शहराध्यक्षांकडे आपल्या सदस्यत्वाचा राजीनामा देऊन या चर्चांना पूर्णविराम दिला आहे. १९९७ पासून महापालिकेवर सलग पाचवेळा निवडून गेलेले, महापालिका स्थायी समितीचे, सभापती आणि सभागृहनेतेपद सांभाळलेले सुरेश पाटील यांच्याकडे भूमिकेकडेही लक्ष वेधले आहे.
सुरेश पाटील सोलापूमधील भाजपचे आक्रमक नेते म्हणून ओळखले जातात. त्यांनी ३० वर्षांपूर्वी दिवंगत नेते लिंगराज वल्याळ यांचा हात धरून भाजपमध्ये प्रवेश केला होता. परंतु मागील २०१७ साली महापालिकेत भाजपची सत्ता आल्यानंतर पक्षांतर्गत गटबाजी वाढली आणि सुरेश पाटील हे पक्षाचे आमदार विजय देशमुख यांच्यापासून दूर गेले.
Edited by - Satish Daud
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.