भयंकर! कॉलेजमधून घरी जाताना वाटेत मृत्यूने गाठलं; भीषण अपघातात २ जिवलग मैत्रिणींचा करुण अंत

राज्यात अपघातांची मालिका सुरू आहे. सोलापूरच्या मोहोळमध्ये भीषण अपघाताची घटना घडली. मोहोळ तालुक्यातील भीषण अपघातात दोन जिवलग मैत्रिणींना जीव गमवावा लागला आहे. मोहोळ तालुक्यातील नजिक पिंपरी गावाजवळ ही घटना घडल्याची माहिती मिळत आहे. या अपघाताने गावात एकच खळबळ उडाली आहे.

मिळालेल्या माहितीनुसार, सोलापूरच्या मोहोळ तालुक्यात टेम्पोने धडक दिल्यामुळे दोन जिवलग मैत्रिणींना गमवावा लागला आहे. मोहोळमधील पिंपरी गावाजवळ हा अपघाताचा थरार पाहायला मिळाला.

अकरावीत शिकणारी प्रज्ञा धनाजी कोकाटे आणि तिची मैत्रीण बारावीत शिकणारी स्नेहल काशिनाथ वाघमोडे अशा अपघातात मृत्यू झालेल्या मुलींची नावे आहेत. प्रज्ञा ही स्कुटीवरून स्नेहलला घेऊन मोहोळवरून कुरुल गावाला जात होती. त्याचवेळी समोरून येणाऱ्या टेम्पोने त्यांना जोरदार धडक दिली.

टेम्पोच्या धडकेत प्रज्ञा जागीच ठार झाली तर स्नेहल ही गंभीर जखमी झाली. यामुळे गंभीर जखमी झालेल्या स्नेहलला तातडीने सोलापुरातील शासकीय रुग्णालयात हलवण्यात आले. मात्र उपचारादरम्यान तिचा मृत्यू झाला.

प्रज्ञा ही अकरावीत नेताजी महाविद्यालयात शिकत होती. तर इयत्ता बारावीची विद्यार्थिनी स्नेहल ही राष्ट्रमाता इंदिरा कन्या महाविद्यालयात शिकत होती. याप्रकरणी पोलीस ठाण्यात नोंद करण्यात आली आहे.

उसाच्या ट्रॅक्टरखाली चिरडून महिला जागीच ठार

नंदूरबारच्या शहादा-दोंडाईचा रस्त्यावरील वनविभाग कार्यालयासमोर भीषण अपघात घडला. दोन दुचाकींच्या अनपेक्षित हालचालीमुळे एका महिलेला जीव गमवावा लागला आहे. शहादा शहराकडे एक दुचाकी जाताना समोरून अचानक दुसरी दुचाकी आल्याने चालकाचे नियंत्रण सुटले.

दुचाकीच्या मागे बसलेल्या महिलेचा तोल गेला आणि ती थेट रस्त्यावरून जाणाऱ्या उसाच्या ट्रॅक्टरच्या चाकाखाली आली. अपघात इतका भीषण होता की, ट्रॅक्टरचे चाक अंगावरून गेल्याने महिलेचा जागीच मृत्यू झालाय. या घटनेमुळे परिसरात मोठी खळबळ उडाली आहे. वाहतूक काही काळ विस्कळीत झाली होती. पोलिसांनी घटनास्थळी धाव घेत पंचनामा केला आहे. तर पोलिसांकडून पुढील तपास सुरू आहे. उसाच्या वाहनांची वाढती वर्दळ आणि अरुंद रस्ते यामुळे प्रवाशांमध्ये भीतीचे वातावरण पसरलं आहे.