Shocking : सोलापूर हादरले! जिवलग मित्रानेच काढला काटा, दगडाने ठेचून तरूणाची हत्या

विश्वभूषण लिमये, सोलापूर

सोलापूरच्या बार्शी तालुक्यातील वैराग परिसरात धक्कादायक घटना घडली आहे. मित्रानेच मित्राची दगडाने ठेचून हत्या केल्याचे समोर आले आहे. क्षुल्लक कारणांवरून सुरु झालेल्या वादातून ही घटना घडली. या घटनेमुळे परिसरात खळबळ उडाली असून मृत व्यक्तीच्या कुटुंबियांवर दुःखाचा डोंगर कोसळला आहे. याप्रकरणी पोलिसांनी गुन्हा दाखल केला आहे. दिनेश उर्फ अप्पासाहेब कापसे असे मृत व्यक्तीचे नाव असून बबलू मुळे असे आरोपीचे नाव आहे.

मिळालेल्या माहितीनुसार, दिनेश उर्फ अप्पासाहेब कापसे आणि आरोपी बबलू मुळे हे दोघेही एकमेकांचे जवळचे मित्र होते. काही दिवसांपासून दोघांमध्ये किरकोळ कारणावरून वाद सुरू होता. दरम्यान, ‘पोलिस ठाण्यात तक्रार देण्यास का पाठवले?’ या मुद्द्यावरून दोघांमध्ये पुन्हा जोरदार वाद झाला. हा वाद इतका वाढला की, आरोपी बबलू मुळे याने संतापाच्या भरात दिनेश कापसे याच्यावर दगडाने वार केले.

डोक्यावर गंभीर मार लागल्याने दिनेशचा जागीच मृत्यू झाला. घटनेनंतर आरोपी घटनास्थळावरून फरार झाला होता. मात्र, स्थानिक पोलिसांनी तात्काळ हालचाल करत आरोपीचा शोध घेण्यास सुरुवात केली आहे. या प्रकरणी मृताच्या भावाने वैराग पोलिस ठाण्यात फिर्याद दिली असून, त्यानुसार बबलू मुळे याच्याविरोधात खुनाचा गुन्हा दाखल करण्यात आला आहे. पोलिसांनी घटनास्थळी पंचनामा करून मृतदेह शवविच्छेदनासाठी पाठवला आहे. तसेच, या घटनेमागील नेमके कारण आणि पूर्वीचे वाद याबाबत अधिक तपास सुरू असल्याची माहिती पोलिसांकडून देण्यात आली.

या घटनेमुळे वैराग परिसरात भीतीचे आणि संतापाचे वातावरण निर्माण झाले आहे. एकेकाळचे जिवलग मित्र असलेले दोघे इतक्या टोकाला जाऊन पोहोचल्याने नागरिकांमध्येही हळहळ व्यक्त होत आहे. क्षुल्लक कारणावरून वाढणारे वाद किती गंभीर परिणाम घडवू शकतात, याचे हे जिवंत उदाहरण ठरले आहे. दरम्यान, आरोपीला लवकरात लवकर अटक करून कठोर कारवाई करण्याची मागणी स्थानिकांकडून केली जात आहे. पोलिसांनीही या प्रकरणाचा सखोल तपास करत आरोपीला लवकरच ताब्यात घेण्याचा विश्वास व्यक्त केला आहे.