सोलापूर जिल्ह्यातून एक धक्कादायक घटना समोर आली आहे. स्मशानभूमीत दफन केलेल्या १० महिन्यांच्या बाळाचा मृतदेह गायब झाला आहे. शहरातील मोदी स्मशानभूमीत हा प्रकार घडला आहे. यामुळे परिसरात एकच खळबळ उडाली आहे. घटनेची माहिती मिळताच पोलिसांनी तातडीने स्मशानभूमीत धाव घेऊन तपास सुरु केला आहे.
प्रियांश वाघमारे (वय १० महिने) असं मृत बाळाचे नाव आहे. मिळालेल्या माहितीनुसार, प्रियांशला खेळताना दुखापत झाली होती. त्याला उपचारासाठी रुग्णालयात दाखल करण्यात आलं होतं. मात्र, उपचारादरम्यान १४ जून रोजी त्याचा मृत्यू झाला.
कुटुंबियांनी त्याच्यावर शहरातील मोदी स्मशानभूमीत अंत्यसंस्कार केले. आज रविवारी तिसऱ्या दिवसाचा विधी करण्यासाठी वाघमारे कुटुंबिय मोदी स्मशानभूमीत पोहचले. यावेळी त्यांना मृतदेह पुरलेल्या ठिकाणी एक खड्डा आढळून आला.
प्रियांशचा मृतदेह कुणीतरी उकरून नेला असावा, असा संशय वाघमारे कुटुंबियांना आला. त्यांनी तातडीने या घटनेची माहिती पोलिसांना दिली. पोलिसांनी स्मशानभूमीत धाव घेत तपास सुरू केला आहे. स्मशानभूमीतून मृतदेह गायब झाल्याने परिसरात मोठी खळबळ उडाली आहे.
जादू टोण्याच्या प्रकारासाठी कुणीतरी बाळाचा मृतदेह उकरून नेला असावा, अशी चर्चा परिसरात सुरू आहे. सध्या पोलिसांकडून घटनेचा कसून तपास केला जात आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.