Bus Accident : प्रवाशांनी भरलेल्या बसला डंपरची धडक; चालकामुळे मोठी दुर्घटना टळली, सातजण जखमी

सोलापूर : सोलापूरहून तेलगावला प्रवाशी घेऊन मार्गस्थ झालेल्या बसला भीषण अपघात झाला. समोरून येणाऱ्या डंपरने बसला जोरदार धडक दिल्याने झालेल्या अपघातात दोन्ही वाहनांच्या चालकांसह एकूण सात जण जखमी झाले. दरम्यान बस चालकाच्या प्रसंगावधानामुळे प्रवाशांचे जीव वाचले. जखमींना जवळच्या रुग्णालयात उपचारासाठी दाखल करण्यात आले आहे. 

मंद्रूप- निंबर्गी रस्त्यावरील निंबर्गी गावाजवळ सदरचा अपघात गुरुवारी रात्री साडेसात वाजण्याच्या सुमारास घडला. सोलापूर- तेलगाव ही मुक्कामी बस चालक विजय लोभे आणि वाहक प्रशांत जेटेथोर घेऊन सोलापूर बसस्थानकावरून मार्गस्थ झाले होते. तर मंद्रूप येथील थांबा घेऊन एसटी निंबर्गीच्या दिशेने निघाली यावेळी बसमध्ये ४० प्रवासी होते. निंबर्गी गावापासून एक किलोमीटर अंतरावर समोरून भरधाव वेगात आलेल्या डंपरने धडक दिली. 

मोठा अनर्थ टळला 

दरम्यान भरधाव वेगाने डंपर येत असल्याचे पाहून बस चालक विजय लोभे यांनी एसटी रस्त्याच्या खाली घेतली. मात्र तोपर्यंत डंपरने धडक दिली. बसला धडक बसल्यामुळे आतील प्रवासी एकमेकांवर आदळले. यामध्ये काही जणांना किरकोळ दुखापत झाली. या अपघातामुळे एकच गोंधळ उडाला. एसटी चालक विजय लोभे यांच्या प्रसंगावधानामुळे या अपघातातील प्रवाशांचे जीव वाचले. 

चालकासह सातजण जखमी 
बस आणि डंपरच्या अपघातात एसटी चालक चालक विजय नागनाथ लोभे आणि डंपर चालक परशुराम बगले या दोघांसह बाबासाहेब आण्णाप्पा कदम (रा. भंडारकवठे), नितीन चिदानंद चौगुले (रा. विंचूर), आनंदराव कलाप्पा सुतार आणि सुनंदा सुरेश सुतार (दोघे रा. तेलगाव), सुनंदा मारुती जोडमोटे (रा. मंद्रूप) असे जखमी झालेल्यांची नावे आहेत.

अपघाताची माहिती मिळताच मंद्रुप पोलीस घटनास्थळी दाखल झाले. यानंतर जखमींना रुग्णवाहिकेतून मंद्रुपच्या ग्रामीण रुग्णालयात आणले. तर परशुराम बगले आणि बाबासाहेब कदम या दोघा जखमींना सोलापूरच्या शासकीय रुग्णालयात पुढील उपचारासाठी पाठवण्यात आले.