Bhimashankar Temple: त्र्यंबकेश्वरनंतर भिमाशंकर मंदिरातही गळती, पहिल्या श्रावणी सोमवारमुळे मोठी गर्दी; भाविकांचे हाल, पाहा VIDEO

Summary -

• भिमाशंकर मंदिरात मुसळधार पावसामुळे सभामंडपात पाणी गळती

• पहिल्या श्रावण सोमवारमुळे मंदिरात मोठी गर्दी झाली असून भाविकांचे हाल

• त्र्यंबकेश्वर मंदिरातही पावसामुळे गळती कायम

• पुरातत्व विभागाने दुर्लक्ष केल्याचा आरोप

रोहिदास गाडगे/ अजय सोनावणे, साम टीव्ही

नाशिकच्या त्र्यंबकेश्वर मंदिरानंतर आता पुणे जिल्ह्यातल्या भिमाशंकर मंदिराला देखील गळती लागली आहे. भिमाशंकर परिसरात गेल्या २४ तासापासून मुसळधार पाऊस पडत आहे. या पावसात भाविकांसाठी मंदिर म्हणजे एकमेव आश्रयस्थान आहे. मात्र मंदिराच्या सभामंडपात पाणी गळती होत असल्याने शेकडो भाविकांची मोठी गैरसोय होत आहे.

भिमाशंकर मंदिराच्या सभामंडपाच्या छतावरून थेट मंडपात पाणी झिरपत असून भाविक भिजत दर्शन घेत आहेत. यासाठी जबाबदारी थेट पुरातन विभागावर येते. पावसाचा अंदाज असूनही वेळेत डागडुजी न केल्यामुळे ही परिस्थिती निर्माण झाली आहे. मंदिर व्यवस्थापन आणि पुरातन विभागाच्या हलगर्जीपणामुळे पावसात चिंब झालेल्या भाविकांना या गळतीचा त्रास सहन करावा लागत आहे.

१२ ज्योतिर्लिंगांमध्ये भिमाशंकर आणि त्र्यंबकेश्वर हे मंदिर येतात. त्र्यंबकेश्वराच्या मंदिरातही गेल्या काही दिवसांपासून गळती सुरू आहे. मंदिराला लागलेली गळती थांबायचं नाव घेत नाही आहे. गेल्या काही दिवसांपासून सतत पडणाऱ्या पावसामुळे मंदिराला गळती लागली आहे. चोल आणि नागरी शैलीतील या मंदिराचा १७५४ साली माधवराव पेशवे यांनी जीर्णोद्धार केला होता.

श्रावणात त्र्यंबकेश्वराच्या दर्शनासाठी एकीकडे भाविकांची मोठी गर्दी होत असते तर दुसरीकडे मंदिराला लागलेली गळती कायम असल्यामुळे भाविकांचे हाल होत आहे. पुरातत्व विभागाच्या दुर्लक्षामुळे मंदिराची दुरावस्था झाल्याचे चित्र पाहायला मिळत आहे. देवस्थान आणि विश्वस्तांकडून पुरातत्व विभागाकडे वेळोवेळी पाठपुरावा करण्यात आला. पुरातत्व विभागाकडून मात्र पाठपुरावा करूनही मंदिराची दुरुस्ती करण्यात आली नाही.

त्र्यंबकेश्वर मंदिराचा गाभारा आणि सभामंडपात मोठ्या प्रमाणात पाणी गळती होत आहे. सभा मंडपात होणाऱ्या गळतीमुळे भाविकांची गैरसोय होत आहे. मंदिरामध्ये आल्यानंतर भाविक या गळतीमुळे भिजत आहेत. तर गाभाऱ्यात देखील गळती होत आहे. या गळतीमुळे मंदिरालाही धोका निर्माण झाला आहे. पहिल्या श्रावणी सोमवारनिमित्त दर्शनासाठी आलेल्या भाविकांनी मंदिर प्रशासनाच्या कारभारावर नाराजी व्यक्त केली आहे.