नेवाशात मुद्रांकाचा तुटवडा, नागरिकांची गैरसोय

अहमदनगर ः नेवासे तहसील कार्यालयात मुद्रांकाचा कृत्रिम तुटवडा निर्माण झाल्याने नागरिकांची मोठी गैरसोय होत आहे. मुद्रांक खरेदीसाठी कोविड काळातही मोठी झुंबड याठिकाणी पाहायला मिळते. चार पैकी एकाच मुद्रांक विक्रेत्यावर सध्या मुद्रांक विक्रीचा डोलारा उभा असून मुद्रांक खरेदीसाठी चार-पाच तास रांगेत उभे रहावा लागत असल्याने ग्राहकांकडून संताप व्यक्त होत आहे.
नेवासे तहसील कार्यालयात परवानगीधारक एकूण चार मुद्रांक विक्रेते आहे. मात्र, गेल्या यापैकी दोघे विक्रेते गेल्या वर्ष-दीड वर्षांपासून कोषागार कार्यालयाकडेचे फिरकलेच नसून त्यांनी आपले परवाने नूतनीकरण देखील केलेले नसल्याची माहिती आहे.

इतर दोघांपैकी एक आठवडा-महिन्याभरातातून एकदा-दोन मुद्रांक विक्री करतो. नेवासे तहसील कार्यालयात दररोज नेवासे व शेवगाव तालुक्यातील शेकडो नागरीक मुद्रांक खरेदीसाठी नेवासे येथे केवळ एकाच मुद्रांक विक्रेत्याकडे गर्दी असते.
मुद्रांक विक्रेत्यांवर दुय्यम निबंधक कार्यालय व मुद्रांक जिल्हाधिकारी विभागाचे नियंत्रणच राहिले नसल्याचे आरोप मुद्रांकाच्या कृत्रिम टंचाईला वैतागलेल्या नागरिकांनी केला आहे. मुद्रांक बरोबरच वीस, दहा व पाच रुपयांचे तिकिटेही मिळत नसल्याने नागरिकांच्या संतप्त भावना व्यक्त होत आहे.
मुद्रांक खरेदीच्या रांगेत 'शेवगावकर'
शेवगाव येथील मुद्रांक विक्रेता तिथे सातत्याने उपस्थितच राहत नसल्याने शेवगाव तालुक्यातील पन्नास टक्के मुद्रांक ग्राहकांचा मोर्चा नेवासेकडे येत असून तहसील कार्यालयात मुद्रांक खरेदीसाठीच्या रांगेत शेवगाव तालुक्यातील नागरिकही पाहायला मिळतात.
"मुद्रांक खरेदीसाठी नागरिकांची अडवणूक किंवा अडचण येणार नाही यासाठी संबंधीत विभागाच्या अधिकाऱयांना याबाबत सूचना देण्यात येतील.
-रुपेशकुमार सुराणा, तहसीलदार, नेवासे

"मुद्रांक खरेदीसाठी गेली दोन-तीन दिवसांपासून मी नेवशाला येतो. मात्र आधीच या ठिकाणी सकाळी नऊ ते सायंकाळी सहापर्येंत खरेदीसाठी मोठीगर्दी व रांग असते. संबंधित विभागाने ही मुद्रांकाची कृत्रिम टंचाई दूर करावी.
- राजेंद्र नागरे, जैनपूर, ता. नेवासे