सांगलीत भोंदूबाबाची एन्ट्री; स्मशानभूमीत आढळली काळी बाहुली अन् सुया, नागरिकांमध्ये दहशत

पुरोगामी महाराष्ट्रात विज्ञानाच्या युगात अघोरी प्रथांचे पेव फुटले असल्याचे धक्कादायक वास्तव समोर आलंय. सांगलीच्या वाळवा तालुक्यातील शेणे येथील स्मशानभूमीत मध्यरात्रीच्या सुमारास करणी आणि जादूटोण्याचा अघोरी प्रकार उघडकीस आलाय. या प्रकारने तालुक्यात खळबळ उडाली आहे. या प्रकारामुळे ग्रामस्थांमध्ये भीतीचे वातावरण पसरलं आहे. भोंदू बाबांविरोधात संताप व्यक्त होत आहे.

शेणे येथील स्मशानभूमी परिसरात सकाळी काही नागरिकांना जादूटोण्याचे साहित्य आढळल्याचे समोर आलं आहे. भोंदूबाबाकडे काळे कापड, टाचण्या टोचलेली काळी बाहुली, लिंबू, सुया, कोहळे आणि नारळ अशा वस्तू विखुरलेल्या अवस्थेत सापडल्या आहेत. वाळवा तालुक्यात गेल्या काही दिवसांपासून अशा घटनांचे सत्र वाढल्याने नागरिकांमध्ये असुरक्षिततेची भावना निर्माण झालीये. मात्र, या घटनेने लोकांच्या मनातील भीती दूर झालेली नाही.

या गंभीर प्रकारावर बोलताना 'अंनिस'चे राज्य कार्याध्यक्ष संजय बनसोडे यांनी प्रशासनाला आणि भोंदू मांत्रिकांना इशारा दिलाय. 'कुठल्याही अघोरी कृत्याने कोणाचे भले किंवा वाईट होत नाही. हे केवळ अज्ञानी लोकांना लुटण्याचे धंदे आहेत, असे बनसोडे यांनी सांगितले.

स्मशानभूमीत अशा अघोरी क्रिया करणारा तो मांत्रिक कोण आणि कोणाच्या सांगण्यावरून हा प्रकार झाला, याबाबत आता गावात उलटसुलट चर्चा सुरू आहेत. अंनिसने या प्रकरणाचा पाठपुरावा करण्याचे आश्वासन दिले आहे. नागरिकांना भोंदूगिरीपासून सावध राहण्याचे आवाहन केले आहे.