Uddhav Thackeray: उद्धव ठाकरेंकडून प्रचारसभांचा धडाका; आज हिंगोलीत ३ मोठ्या सभा घेणार; शिंदे गटाचं टेन्शन वाढणार?

Uddhav Thackeray in Hingoli

लोकसभा निवडणुकीचा बिगुल वाजला असून महाराष्ट्रात ५ टप्प्यात मतदान पार पडणार आहे. यापार्श्वभूमीवर राजकीय नेत्यांनी मतदारसंघ पिंजून काढण्यास सुरुवात केली आहे. ठाकरे गटाचे प्रमुख उद्धव ठाकरे यांनी प्रचारसभांचा धडाकाच लावला आहे. त्यांच्या सभेला ठिकठिकाणी मोठा प्रतिसाद मिळत आहेत. दरम्यान, आज उद्धव ठाकरे हिंगोली दौऱ्यावर असून संतोष बांगर यांच्या बालेकिल्ल्यासह तीन विधानसभा मतदारसंघात सभा घेणार आहेत. ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

उद्धव ठाकरेंच्या (Uddhav Thackeray) स्वागतासाठी शिवसैनिकांनी जय्यत तयारी केली असून ते सभेत नेमकं काय बोलणार? याकडे संपूर्ण हिंगोलीकरांचं लक्ष लागून आहे. हिंगोली लोकसभा तसेच विधानसभा मतदारसंघ शिवसेना शिंदे गटाच्या ताब्यात आहेत. याठिकाणी हेमंत पाटील खासदार असून संतोष बांगर आमदार म्हणून निवडून आलेले आहेत.

शिवसेनेच्या फुटीनंतर सर्वात शेवटी आमदार संतोष बांगर (Santosh Bangar) आणि खासदार हेमंत पाटील यांनी उद्धव ठाकरे यांची साथ सोडली होती. त्यानंतर वेळोवेळी त्यांनी उद्धव ठाकरे यांच्यावर टीका केली. आज हिंगोलीतील सभेत ठाकरे त्यांच्या दोन जुन्या शिलेदारावर नेमकं काय बोलणार हे पाहणं महत्वाचं ठरणार आहे. (Latest Marathi News)

एकीकडे महायुतीमध्ये जागावाटप सुरू असताना उद्धव ठाकरे यांनी अनेक लोकसभा मतदारसंघात सभा घेत उमेदवार घोषित केले आहेत. त्यामुळे आजच्या सभेत हिंगोली लोकसभा मतदारसंघातील देखील उमेदवाराच्या नावाची घोषणा होण्याची शक्यता आहे.

हिंगोली लोकसभेसाठी माजी आमदार नागेश पाटील आष्टीकर, रुपाली पाटील गोरेगावकर, यांच्या नावांची जोरदार चर्चा आहे. माजी मंत्री जयप्रकाश मुंदडा आणि शिवसेनेचे जिल्हाप्रमुख संदेश देशमुख यांना देखील ठाकरे गटाकडून लोकसभेचं तिकीट दिलं जाऊ शकतं.