शिंदे सेनेच्या नेत्यावर प्राणघातक हल्ला, करमाळ्यातील शेतात मारलं, संशयाची सुई कुणाकडे?

सोलापुरातील करमाळ्यातून एक धक्कादायक बातमी समोर येत आहे. शिवसेना पंढरपूर विभाग जिल्हाप्रमुख (शिंदे गट) महेश चिवटे यांच्यावर प्राणघातक हल्ला करण्यात आला आहे. हा हल्ला सकाळी झाला असल्याची माहिती आहे. हल्ला झाल्यानंतर पोलीस निरीक्षक रणजीत माने घटनास्थळी दाखल झाले असून, घटनेचा तपास पोलिसांकडून सुरूआहे. या घटनेनंतर परिसरात खळबळ उडाली आहे.

मिळालेल्या माहितीनुसार, महेश चिवटे हे राज्याचे उपमुख्यमंत्री एकनाथ शिंदे यांचे स्वीय सहाय्यक मंगेश चिवटे यांचे ज्येष्ठ बंधू असल्याची माहिती आहे. करमाळा तालुक्यातील हिवरवाडी येथे सकाळच्या सुमारास या हल्ल्याची घटना घडली. महेश चिवटे शेतात गेल्यावर त्यांच्यावर हल्ला झाला.

हल्ला झाल्यानंतर परिसरात खळबळ उडाली. या घटनेनंतर पोलीस निरीक्षक रणजीत माने घटनास्थळी दाखल झाले. या घटनेचा अधिक तपास सध्या पोलिसांकडून सुरू आहे. यानंतर चिवटे यांना करमाळा उपजिल्हा रूग्णालयात दाखल केले. आपल्यावर करण्यात आलेला हल्ला कट आणि सुडापोटी करण्यात आल्याचा आरोप त्यांनी केला आहे. चिवटे यांच्यावर झालेला हल्ला आणि गंभीर आरोपांमुळे राजकीय वर्तुळात खळबळ उडाली आहे.