राजकारण तापलं! शिंदेसेना आणि राष्ट्रवादीचे नेते एकमेकांना भिडले; नेमकं काय घडलं?

सचिन कदम, साम टीव्ही

राज्याच्या राजकारणात शिंदेसेना आणि राष्ट्रवादी कॉँग्रेस एकत्र असली तरी रायगडमध्ये या दोन्ही पक्षाचे नेते आणि कार्यकर्त्यांमध्ये जो वाद आहे तो सर्वश्रुत आहेत. शिंदेसेनेचे नेते मंत्री भरत गोगावले आणि राष्ट्रवादीचे नेते सुनील तटकरे यांच्यात मागच्या अनेक वर्षांपासून राजकीय संघर्ष पाहायला मिळतो. यामुळेच आता कार्यकर्त्यांमध्ये देखील एकमेकांच्या विरोधात खटके पडायला सुरुवात झाली आहे.

खालापूर तहसीलदार कार्यालयात बैठक सुरू असताना हा प्रकार घडला. खालापूर परिसरात एल अँड टी (L&T) कंपनीच्या प्रस्तावित प्रकल्पावरून आणि स्थानिक रोजगाराच्या मुद्द्यावरून गेल्या महिनाभरापासून शिवसेना आणि राष्ट्रवादी काँग्रेसच्या कार्यकर्त्यांमध्ये वाद सुरू आहे. याच मुद्द्यावर चर्चा करण्यासाठी बैठक आयोजित करण्यात आली होती. आमदार महेंद्र थोरवे यांचे बंधू विश्वनाथ थोरवे आणि राष्ट्रवादी काँग्रेसचे जिल्हाध्यक्ष सुधाकर घारे यांच्या उपस्थितीत बैठक सुरू असताना दोन्ही पक्षांचे कार्यकर्ते एकमेकांसमोर आले. यावेळी दोन्ही बाजूंमध्ये शाब्दिक वाद झाला. परिस्थिती चिघळण्याची शक्यता लक्षात घेऊन पोलिस आणि महसूल प्रशासनाने वेळीच हस्तक्षेप केला. त्यानंतर बैठकीतील वाद मिटवण्यात आला.

मागच्या अनेक दिवसांपासून कर्जत आणि खालापूर परिसरात शिवसेना आणि राष्ट्रवादी काँग्रेसमधील संघर्ष वारंवार समोर येत आहे. राज्यात दोन्ही पक्ष सत्तेत एकत्र असले, तरी स्थानिक पातळीवर प्रकल्प आणि रोजगाराच्या मुद्द्यांवरून कार्यकर्त्यांमध्ये मतभेद निर्माण होत असल्याचं या घटनेतून दिसून येत आहे.