Maharashtra Politics : शिंदे गटाचा 120 जागांवर दावा, अजित पवार गटाने केली इतक्या जागांची मागणी; भाजपची भूमिका काय?

आगामी विधानसभा निवडणुकीसाठी महायुतीत जागावाटपाच्या प्रक्रियेला वेग आलाय. महायुतीतल्या सर्व पक्षांच्या नेतृत्वाच्या जागावाटपावर बैठकाही सुरू झाल्याचं कळतंय. अशातच शिंदे गटाचे आमदार संजय गायकवाड यांनी केलेल्या वक्तव्यामुळे वाद पेटण्याची शक्यताय. शिवसेना राज्यात 120 जागा लढवेल, असा दावा संजय गायकवाडांनी केलाय.

एवढंच नव्हे तर १०० जागा जिंकण्याचा विश्वासही गायकवाडांनी व्यक्त केलाय. तर दिल्लीतले नेते महायुतीतल्या सर्व पक्षांना न्याय देतील, अशी आशा भुजबळांनी व्यक्त करत गायकवाडांना टोला लगावलाय.

शिंदेंच्या शिवसेनेचा तब्बल १२० जागांचा दावा भाजप आणि अजित पवारांच्या राष्ट्रवादीला कदापी मान्य होणार नाही. कारण महायुतीतले मोठे तीन पक्ष आणि छोट्या पक्षांचा विचार करूनच अजित पवारांनी केवळ ६० जागांचा आग्रह धरलाय. गेल्यावेळी राष्ट्रवादी काँग्रेसनं आणि त्यांना समर्थन करणाऱ्या अपक्ष आमदारांनी जिंकलेल्या जागांवर अजित पवारांनी दावा सांगितलाय. मात्र त्यांच्या दुप्पट जागा शिंदे गटाला हव्या आहेत. शिंदे गटाचा आत्मविश्वास वाढण्याला कारणंही तशीच आहेत.

शिवसेनेला हव्या 120 जागा

लोकसभेला शिंदे गटाचा स्ट्राईकरेट भाजप आणि राष्ट्रवादीपेक्षा चांगला राहिला आहे. लोकसभेत भाजप आणि राष्ट्रवादीला अपेक्षेपेक्षा फारच कमी जागा जिंकता आल्या. लाडकी बहीण योजना मुख्यमंत्र्यांचीच असल्याचं बिंबवण्यात यश शिंदे गटाला यश येताना दिसत आहे. एकनाथ शिंदे यांनी मीच महायुतीचा कॅप्टन असल्याचं जाहीर विधान केलं होतं. त्यामुळे शिंदे गटानं जागावाटपाबाबत आक्रमक भूमिका घेतल्याचं दिसतंय. तर ठाकरे गटानं १२० जागांच्या दाव्याची खिल्ली उडवलीय.

दरम्यान, गेल्या दोन विधानसभा निवडणुकांमध्ये शंभरीपार गेलेला भाजपची यावेळी दोन पक्षांसोबत महायुती आहे. त्यामुळे जास्तीत जास्त जागा पदरात पाडून घेण्याचं मोठं आव्हान भाजपसमोर आहे. कारण शिंदे गटाला लोकसभेत मिळालेलं यश आणि दिल्लीश्वर त्यांची राखत असलेली मर्जी पाहता शिंदे गटही जास्तीत जास्त जागांवर दावा करतोय. जास्त जागा लढवल्या तरच जास्त जागा जिंकण्याची शक्यता आहे. महायुतीतलं मुख्यमंत्रिपद आपल्याकडेच राहावं यादृष्टीनं शिंदे गट रणनीती आखत असल्याचं दिसतंय.