Shahapur : आमदाराच्या गावात बस येईना; विद्यार्थ्यांची रोज १० किमीची पायपीट, गावातील विद्यार्थीनी रोखली बस

फैय्याज शेख 
शहापूर : गाव तिथे रस्ता आणि रस्ता तेथे बस हे राज्य परिवहन महामंडळाचे ब्रीद आहे. परंतु शहापूर तालुक्यातील कोठारे गाव आमदारांचे असताना देखील या गावात विद्यार्थ्यांना घरी जाण्यासाठी महामंडळाची बस मिळत नसल्याची परिस्थिती आहे. यामुळे या गावातील विद्यार्थ्यांना रोज १० किमीची पायपीट करत यावे लागते. रोजच्या या त्रासाला कंटाळून विद्यार्थ्यांनी आज धसई गावाच्या चौकात बस रोखली आहे. 

शहापूर विधानसभेचे आमदार दौलत दरोडा यांचे कोठारे हे गाव असून जर आमदारांच्या गावातील विद्यार्थ्यांचे हे हाल आहेत. तर शहापूर तालुक्यात काय समस्या असतील; असा प्रश्न निर्माण होत आहे. शहापूर तालुक्यातील दुर्गम भागातील व आमदारांचा गाव म्हणून ओळखले जाणारे कोठारे गावातील विद्यार्थी दररोज धसई गावातील हायस्कूलमध्ये जाण्यासाठी बसने प्रवास करतात. मात्र शाळा सुटल्यानंतर परतीच्या प्रवासाला बस उपलब्ध नसल्याने यापैकी काही विद्यार्थी १० किलोमीटरचा पायी प्रवास करून घर गाठतात. 

शाळा सुटल्यानंतर बस मिळेना 

कोठारे गावातील विद्यार्थी धसई गावातील कै. किसन बाबा विद्यामंदिर हायस्कूलमध्ये शिक्षण घेत आहेत. सकाळी शाळेत जाण्यासाठी बस मिळत असते. मात्र शाळा सुटल्यानंतर बस उपलब्ध होत नसल्याची समस्या आहे. दररोज शाळेत येण्यासाठी घरून पैसे मिळतातच असे नाही. यामुळे बहुतेक विद्यार्थी जंगलातून पायीच प्रवास करतात. आता पावसाळ्याचे दिवस असल्याने बिकट समस्या जाणवणार आहे. 

पालकांकडून अनेकदा मागणी 

अनेक वेळा विद्यार्थी व पालक यांनी शहापूर बसस्थानकात जावून लेखी देत बसची मागणी केली. मात्र बस उपलब्ध होत नसल्याने अखेर विद्यार्थ्यांनी धसई गावात बसच रोखून धरली आहे. जोपर्यंत आम्हाला परतीच्या प्रवासाला बस उपलब्ध करून देत नाही; तोपर्यंत बस सोडणार नसल्याची भूमिका विद्यार्थ्यांनी घेतलेली आहे. यामुळे बस प्रवाशांचा देखील खोळंबा झाला होता.