Walmik Karad : SITत वाल्मिक कराडचेच यार, तपास कसा होणार? पाहा स्पेशल रिपोर्ट

बीडमधले सरपंच संतोष देशमुख हत्या प्रकरणात मुख्यमंत्र्यांनी सखोल चौकशीसाठी एसआयटी स्थापन केली....तपासाला वेग आला....थेट खुनाच्या गुन्ह्याशी संबंधित असलेल्या ७ पैकी सहा आरोपींना अटकही झाली...मात्र याचा मुख्य सूत्रधार म्हणून आरोप होत असलेला आणि सध्या खंडणीच्या गुन्ह्यात जेलमध्ये असलेल्या वाल्किम कराडच्या एका फोटोवरून एसआयटीच्या संपूर्ण तपासावरच प्रश्वचिन्ह निर्माण झालंय. या फोटोमुळे एसआयची वादाच्या भोवऱ्यात सापडलीय.

या एसआयटीतला अधिकारी पीएसआय महेश विघ्ने आणि वाल्मिक कराड यांचा एकमेकांच्या खांद्यावर हात ठेवून काढलेला फोटो व्हायरल झालाय. त्यामुळे विरोधकांनी ही एसआयटीच बरखास्त करण्याची मागणी केलीय. आधी वाल्मिक कराड आणि अन्न व नागरी पुरवठा मंत्री धनंजय मुंडे यांच्या निकटच्या संबंधांवरून आधीच विरोधकांनी महायुतीला घेरलंय. त्यात आला हा फोटो आल्यामुळे आणखी वाद चिघळलाय.

सरपंच हत्या प्रकरणी भाजपचे आमदार सुरेश धस यांनी विधीमंडळाच्या अधिवेशनात आक्रमकपणे भूमिका घेतली होती. लातूर, बीड, परभणी, पुणे येथे आक्रोश मोर्चामध्येही धस यांनी थेट मंत्री धनंजय मुडेंच्या राजीनाम्याची मागणी केली आहे. धस यांनीही एसआयटीमधील दोन अधिकाऱ्यांना हटविण्याची मागणी केली आहे.

संसदेतही हत्या प्रकरणाचे पडसाद उमटलेत. एव्हढं संवेदनशील प्रकरण असताना एसआयटीमध्ये प्रामाणिक आणि कर्त्यव्यकठोर अधिकाऱ्यांची नावे अपेक्षित होती. मात्र तसं काही झालं नाही. एसआयटीमधील अधिकारीच जर कराडचा दोस्त असेल तर चौकशीचा केवळ फार्स ठरेल. त्यामुळे आता गृहखात्याचीही जबाबदारी असलेले मुख्यमंत्री फडणवीस याबाबत काय निर्णय घेतात ते पाहणं महत्वाचं आहे.