७५ वर्ष पूर्ण, आता मोदी रिटायर होत आहेत? एनडीएकडून मोदींचा सत्कार का झाला? बड्या खासदारानं सांगितलं..

प्रसारमाध्यमांशी बोलताना संजय राऊत यांनी विविध विषयावर भाष्य केलं. 'लाहोर, बलुचिस्तान.... आता पीओके घेणार असं पंतप्रधान म्हणाले होते. जर त्यांनी पीओके घेतला असता तर, आम्हीच त्यांचा सत्कार केला असता', असं म्हणत संजय राऊत यांनी चिमटा काढला.

'दिल्लीमध्ये ७ तारखेला राहुल गांधींनी त्यांच्या निवासस्थानी यूपीए, इंडिया ब्लॉकची बैठक बोलावली आहे. या बैठकीला प्रमुख नेते उपस्थित असतील. आमच्या बैठकीमुळे त्यांच्या (नरेंद्र मोदी) यांच्या मनामध्ये भय निर्माणझालं आहे. त्यामुळे त्यांनी एनडीएची बैठक बोलावली. त्यांचा हा जुना कार्यक्रम. यामुळे आमच्या बैठकीवर कोणताही परिणाम होणार नाही', असं राऊत म्हणाले.

'एनडीएच्या आजच्या बैठकीत पंतप्रधान मोदींचा सत्कार झाला. तो कशाकरीता झाला? सप्टेंबरमध्ये ७५वर्षे पूर्ण झाल्यावर नरेंद्र मोदी रिटायर होत आहेत का? आणखी कशाकरीता एनडीए लोकं त्यांचा सत्कार करणार आहेत? नक्की कारण काय?', असा सवाल त्यांनी उपस्थित केला.

आम्हीच त्यांचा सत्कार केला असता..पण

'खरंतर ऑपरेशन सिंदूर त्यावेळेस थांबवलं नसतं. मोदींनी वचन दिल्याप्रमाणे पीओके ताब्यात आलं असतं, तर नक्कीच आम्ही सगळ्यांनी मिळून नरेंद्र मोदींचा सत्कार केला असता', असा खोचक टोला संजय राऊतांनी लगावला. 'पंतप्रधानांनी जे सांगितलं ते करून दाखवलं आहे. आता पिओके घेणार असं राजनाथ सिंग, अमित शहा आणि नरेंद्र मोदी म्हणाले होते. पण तसं घडलं नाही. त्यांचा सत्कार करण्यासाठी आम्हाला संधी मिळालीच नाही. याबद्दल आम्हाला दु:ख आहे', अशी खोचक टीकाही यावेळी त्यांनी केली.