पुण्यानंतर सांगलीत गोळीबाराचा थरार; बड्या नेत्याच्या नातवाची गोळ्या झाडून हत्या

पुण्यानंतर सांगलीत घडली गोळीबाराची घटना

गोळीबाराच्या घटनेने सांगलीतील संजय नगर हादरलं

१४ वर्षीय चिमुरड्याचा गोळीबारात मृत्यू

पुण्यातील सहकारनगरमध्ये गोळीबार झाल्याची घटना ताजी असताना आता सांगलीतही गोळीबाराची घटना उघडकीस आली आहे. सांगलीतील भरवस्तीत घरात घुसून गोळीबार करण्यात आल्याची घटना उघडकीस आली आहे. १४ वर्षीय मुलाची गोळ्या झाडून हत्या करण्यात आल्याने खळबळ उडाली आहे.

माथाडी नेते बाळासाहेब बंडगर यांचा नातू १४ वर्षीय वेदांत मारुती बंडगर याच्या डोळ्यात गोळी घुसली. त्यामुळे वेदांतचा जागीच मृत्यू झाला आहे. सांगलीतील संजय नगरमध्ये राहणारे बाळासाहेब बंडगर यांच्या घरात 7 वाजल्याच्या सुमारास चार ते पाच अज्ञातांनी घरात घुसून गोळीबार केला.

घरात असलेल्या १४ वर्षीय वेदांत याच्यावरही गोळ्या झाडण्यात आल्या. गोळीबाराने परिसरामध्ये एकच खळबळ झाली आहे. गोळीबार झाल्याची माहिती मिळताच संजय नगरमध्ये सहपोलीस अधीक्षक तुषार जोशी हे घटनास्थळी दाखल झाले.

घटनेनंतर आरोपींच्या शोधासाठी पथके रवाना करण्यात आली आहे. या घटनेनंतर जिल्ह्यात नाकाबंदी देखील करण्यात आली आहे. तर व्यवसायिक वादातून ही घटना झाल्याच्या प्राथमिक अंदाज पोलिसांकडून व्यक्त करण्यात आलाय. संजय नगर परिसरामध्ये मोठा पोलीस बंदोबस्त करण्यात आला आहे.

वेदांतचा मृतदेह शवविच्छेदनासाठी वेदांतचा मृतदेह सांगलीच्या शासकीय रुग्णालयामध्ये पाठवण्यात आला आहे. या ठिकाणी नातेवाईकांची आक्रोश पाहायला मिळत आहे.

पुण्यात तरुणावर गोळीबार

तत्पूर्वी, पुण्यातील सहकारनगरमध्ये शिंदे हायस्कूलजवळ बुधवारी रात्री गोळीबाराची घटना घडली. दुचाकीवरून आलेल्या दोघांनी एका मेडिकलबाहेर थांबलेल्या व्यक्तीवर तीन गोळ्या झाडल्या. या गोळीबारात संबंधित तरुण जखमी झाला. या तरुणाला तातडीने खासगी रुग्णालयात दाखल करण्यात आलं.