Sangli Crime : बनावट आयकर अधिकाऱ्यांकडून दरोडा; डॉक्टरांच्या घरातून कोट्यवधींचे सोने व रोकड लांबविली

सांगली : अक्षय कुमारच्या 'स्पेशल २६' या चित्रपटाच्या कथेप्रमाणे बनावट आयकर अधिकारी बनून एका डॉक्टराच्या घरात दरोडा टाकण्यात आल्याचा धक्कादायक प्रकार सांगलीतल्या कवठेमहांकाळमध्ये समोर आला आहे. या प्रकारात डॉक्टराच्या घरातून कोट्यवधी रुपयांचे सोने आणि रोकड लुटण्यात आले आहे. या घटनेने परिसरात खळबळ उडाली असून या प्रकरणी पोलिसांकडून तपास करण्यात येत आहे. 

सांगलीच्या कवठेमहांकाळ शहरात रविवारी मध्यरात्रीच्या सुमारास घडलेल्या थरारक दरोड्याने संपूर्ण तालुका हादरला आहे. शहरातील नामांकित डॉक्टर जगन्नाथ म्हेत्रे यांच्या घरी चार अज्ञात व्यक्तींनी आयकर विभागाचे अधिकारी असल्याचे भासवून घरात प्रवेश केला. यानंतर त्यांनी कोट्यवधींचे सोने व रोकड लंपास केली आहे. या घटनेमुळे प्रसिद्ध हिंदी चित्रपट स्पेशल 26ची आठवण शहरवासीयांना झाली आहे. 

सर्च वॉरंट दाखवत घराची झडती 

दरम्यान चार जणांनी रविवारी रात्रीच्या सुमारास घरात प्रवेश केला.डॉक्टर म्हेत्रे यांना सर्च वॉरंट दाखवत चौघांनी सिने स्टाईल पद्धतीने घराची झडती घेतली. ज्यामध्ये घरात असणारी १६ लाखांची रोकड तसेच तब्बल एक किलोच्या आसपास सोन्याचे दागिने असे जवळपास २ कोटींचे जप्त करत असल्याचे सांगत या चारही बनावट आयकर अधिकाऱ्यांनी तेथून काढता पाय घेतला.  

पोलिसांकडून तपास सुरु 

मात्र या प्रकरणानंतर डॉक्टर म्हेत्रे यांना संशय आल्याने डॉक्टरांनी कवठेमहांकाळ पोलिसांना घडल्या प्रकारची माहिती दिली. यानंतर पोलिसांनी डॉक्टरांच्या घरी धाव घेत, आयकर छापा बोगस सर्व प्रकरणाचा तपास सुरू केला आहे. मात्र तोतया आयकर विभागाच्या धाडीमुळे सांगली जिल्ह्यामध्ये एकच खळबळ उडाली आहे.