सांगलीत एसटी बसची समोरासमोर धडक, भीषण अपघातात 3 प्रवाशांचा जागेवर मृत्यू; 15 ते 20 जखमी

विजय पाटील, साम प्रतिनिधी

सांगलीच्या खानापूर तालुक्यातल्या रेणावी येथे 2 एसटी बसचा भीषण अपघात झाला आहे. यामध्ये दोन ते तीन जण ठार झाले असून 15 ते 20 जण गंभीर जखमी झाल्याची प्राथमिक माहिती समोर आली आहे. रेणावी येथील घाटामध्ये समोरासमोर धडक झाल्याने हा अपघात घडला आहे. विटावून घेऊ घाटला जाणारी आणि विजापूरहून मेढा या ठिकाणी जाणाऱ्या बसचा समोरासमोर हा भीषण अपघात झाला आहे. अपघातानंतर जखमींना तातडीने रुग्णालयामध्ये उपचारासाठी दाखल करण्यात आला आहे. यामधील काही जणांची प्रकृती ही चिंताजनक असल्याचं सांगण्यात येत आहे.

मिळालेल्या प्राथमिक माहितीनुसार, विट्याहून आटपाडी घाटाच्या दिशेने जाणारी एसटी बस विजापूरहून मेढा (जि. सातारा) कडे जाणारी एसटी बसला धडकलीय. रेणावी घाटातील तीव्र वळणावर या बसेसचा अपघात झाला. घाटातील वळणाचा अंदाज न आल्याने दोन्ही बसेसची अत्यंत जोरात धडक झाली. धडक एवढी भीषण होती की दोन्ही बसेसच्या पुढच्या भागाचा पुरता चक्काचूर झाला आहे.