Paithan News : पैठणवरुन KBC पर्यंत कसे पोहोचले, १ कोटीचा प्रश्न का सोडला, ५० लाख जिंकलेल्या शेतकऱ्याची कहाणी

छत्रपती संभाजीनगर : कौन बनेगा करोडपती या टीव्ही शो मध्ये अनेकांनी मोठी रक्कम जिंकत करोडपती झाले आहेत. अशात यंदाच्या सीझनमध्ये छत्रपती संभाजीनगरच्या पैठण तालुक्यातील तांडा बुद्रुक गावातील शेतकरी कैलास रामभाऊ कुंटेवाड यांनी KBC शोमध्ये १ कोटी रुपयांचा प्रश्न सोडला आणि ५० लाख रुपयांचे बक्षीस जिंकले आहे. 

कौन बनेगा करोडपतीचा १७ वा सीझन सध्या सुरु आहे. या शोच्या आतापर्यंत झालेल्या सीझनमध्ये अनेकजण करोडपती झाले आहेत. तर अनेकांनी लाखो रुपयांची रक्कम जिंकली आहे. याच शोच्या यंदाच्या सिझनमध्ये संभाजीनगर जिल्ह्यातील पैठण तालुक्यातील तांडा बुद्रुक गावातील शेतकरी कैलास रामभाऊ कुंटेवाड यांना हॉटसीटवर बसण्याची संधी मिळाली. त्यांनी एक- एक प्रश्नांची अचूक उत्तर देत १ कोटी रुपयांच्या प्रश्नापर्यंत पोहचले होते.  

शेतकरी कैलास कुंटेवाड यांच्याकडे केवळ दोन एकर कोरडवाहू शेती असून यातून मिळणारे उत्पन्न हेच त्यांच्या कुटुंबाचे मुख्य आधार आहे. आर्थिक परिस्थितीमुळे बारावीनंतर शिक्षण थांबलं. पण शिकण्याची ओढ मात्र कायम राहिली. त्यांनी आपल्या जिद्दीच्या जोरावर यूट्यूब आणि पुस्तकांच्या माध्यमातून सामान्य ज्ञान वाढवलं आणि केबीसीमध्ये जाण्याचं स्वप्न उराशी बाळगून सातत्याने प्रयत्न सुरू ठेवले. 

तिसरा प्रयत्न आणि ५० लाखाचे बक्षीस 

'कौन बनेगा करोडपती'मध्ये सहभागी होण्याचा कैलास यांनी तीन वेळा प्रयत्न केला. पहिल्या दोन वेळेस अपयश आलं, पण खचून न जाता तिसऱ्या प्रयत्नात त्यांनी हॉटसीटपर्यंतची मजल मारली. यात कैलास कुंटेवाड यांनी १४ प्रश्नांची अचूक उत्तरं देत ५० लाख रुपयांचे बक्षीस जिंकले. यानंतर १५ व प्रश्न १ कोटी रुपयांसाठी होता. मात्र लाईफलाईन घेतल्यानंतर देखील या प्रश्नाचे उत्तर देणे शक्य नसल्याने त्यांनी गेम क्वीट करत ५० लाख रुपयांचे बक्षीस जिंकले.