Heavy Rain : पैठण तालुक्यात ढगफुटी सदृश्य पाऊस; २० गावांचा संपर्क तुटला

छत्रपती संभाजीनगर : राज्यातील अनेक भागात मुसळधार पाऊस होत आहे. त्यानुसार संभाजीनगर जिल्ह्यातील पैठण तालुक्यात देखील पावसाने झोडपून काढले आहे. यात तालुक्यातील लोहगाव परिसरात रात्री ढगफुटी सदृश्य पावसाने पाझर तलाव फुटल्याने तोंडोळी रोडवरील वाहतूक ठप्प झाली आहे. यामुळे मावसगव्हाणकडे जाणारा मार्ग बंद पडला आहे. तब्बल २० गावांचा संपर्क तुटला आहे.

संभाजीनगर जिल्ह्यातील पैठण तालुक्यात मुसळधार पावसाने झोडपून काढले आहे. यामध्ये लोहगावात १६० मिमी पावसाची नोंद झाली आहे. तर तालुक्यातील मावसगव्हान, लामगव्हान, ब्रम्हगव्हान, वाड्या वस्तीवरील जनजीवन विस्कळित झाले आहे. तसेच डांगे वस्तीवरील घरांमध्ये पाणी शिरले असून शेतीक्षेत्र पाण्याखाली गेले आहे. कातपूरजवळ नदीला आलेल्या पुरामुळे बालानगर- पैठण- वरुडी मार्गावरील रस्ता बंद करण्यात आला असून प्रशासनाने वाहनधारकांना पर्यायी मार्गाचा वापर करण्याचे आवाहन केले आहे.

जिंतूर तालुक्यातील दोन मंडळांमध्ये मुसळधार पाऊस
परभणीच्या जिंतूर तालुक्यातील बोरी आणि दुधगाव या दोन मंडळांमध्ये मुसळधार पाऊस झाला. जवळपास तीन तास पाऊस पडत असल्यामुळे जिंतूर तालुक्यातील या दोन्ही मंडळांमध्ये मोठ्या प्रमाणावर नुकसान झाले आहे. त्यातच करवली, पिंपरी, रोहीला, बोरवाडी, कसर या गावांतील काही घरांमध्ये पाणी शिरले असून संसारउपयोगी साहित्य अन्नधान्याचे नुकसान झाले. तसेच करवली गावातील मारोती मंदीरातही पाणी साचले आहे. त्याचप्रमाणे या गावांच्या परिसरातील ओढे नाले ओसंडून वाहत आहेत.

पुरात वाहून जाणाऱ्या शेतकऱ्याला वाचवले
हिंगोली : हिंगोलीच्या इसापूर रमणा गावात ओढ्याला आलेल्या पुरात शेतकरी वाहून जात असताना एका तरुणाने जीवाची बाजी लाऊन प्राण वाचवले आहेत. आनंदा खंदारे असे वाहून जाणाऱ्या शेतकऱ्याचे नावआहे.  पुरातून बाहेर काढत या शेतकऱ्याचे प्राण वाचवणाऱ्या व्यक्तीचे नाव मनोज राठोड असे आहे. दरम्यान पुरात वाहून जाताना या शेतकऱ्याचा व्हिडिओ गावकऱ्यांनी मोबाईल कॅमेऱ्यात कैद केला आहे. हा थरार पाहून अनेकांच्या अंगावर काटा उभा राहिला होता.