Water Shortage : संभाजीनगर शहरातच टँकरच्या फेऱ्या ४५० पार; महापालिकेच्या नो नेटवर्क भागात टँकरची मागणी वाढली

रामू ढाकणे 

छत्रपती संभाजीनगर  : दिवसेंदिवस वाढत चाललेल्या उन्हाच्या तडाख्याने सर्वत्रच पाणी टंचाईचा सामना करावा लागत आहे. पाण्याच्या टंचाईमुळे शहरातील नागरिकांना देखील आता पाणी टंचाईचा मोठा सामना करावा लागत असल्याचे चित्र दिसून येत आहे. दरम्यान संभाजीनगर शहरातील पाणी पुरवठा करणाऱ्या टँकर्सच्या फेऱ्या आता ४५० च्या वर गेले आहेत. 

यंदा कमी पावसामुळे भीषण पाणी टंचाईचा सामना करावा लागत आहे. ग्रामीण भागासह आता शहरी भागात देखील पाणी टंचाईची झळ बसायला सुरवात झाली आहे. या दरम्यान संभाजीनगर शहरातील एन ५, चिस्तीया चौक, रोकडा हनुमान कॉलनीसह नक्षत्रवाडी येथून दररोज ८५ टँकर भरले जात होते. आता त्याच टँकरची संख्या १०० पेक्षा अधिक झाल्याने शहरातील नो नेटवर्क परिसरात पाण्याचा पुरवठा करण्यासाठी टँकरच्या फेऱ्यात ४०० हून अधिक वाढ झाल्याने शहरातील जलसंकट गहिरे होत चालले आहे. 

जिल्ह्यातही भीषण टंचाई 

संभाजीनगर जिल्ह्यातील टंचाईची परिस्थिती बिकट होत चालली असल्याने आचारसंहितेची झळ टंचाई निवारणाच्या कामांना आणि टँकर पूरवठ्यावर होऊ नये असे निवडणूक आयोगाचे स्पष्ट निर्देश आहे. तर जिल्हा परिषद प्रशासनाकडून ३८० गावे आणि ५७ वाड्यांमध्ये जवळपास ६०९ टँकरद्वारे पाणी पुरवठा होत असून २७० विहिरी अधिग्रहित करण्यात आल्या आहेत. दरम्यान जायकवाडी धरणात केवळ ७ टक्के जलसाठा शिल्लक असल्याने या महिन्यात टँकरच्या संख्येत वाढ होण्याची शक्यता आहे.