संत गजानन महाराजांचे दर्शन घेऊन परतताना अनर्थ घडला; मुंबई-कोलकाता राष्ट्रीय महामार्गावरील अपघातात तिघांचा जागीच मृत्यू

संजय जाधव, साम प्रतिनिधी

मुंबई-कोलकाता राष्ट्रीय महामार्ग क्रमांक ५६ वर खामगावजवळ भीषण अपघात घडला आहे. भरधाव दुचाकीने ट्रकला जोरदार धडक दिल्याने या दुर्घटनेत तीन तरुणांचा जागीच मृत्यू झाला. या घटनेमुळे परिसरात हळहळ व्यक्त होत आहे.

मिळालेल्या माहितीनुसार, तिन्ही तरुण शेगाव येथे संत गजानन महाराजांचे दर्शन घेऊन आपल्या गावी परतत होते. यावेळी खामगावजवळ त्यांच्या दुचाकीची ट्रकला जोरदार धडक बसली. अपघाताची तीव्रता इतकी भीषण होती की, तिघांचाही जागीच मृत्यू झाला.

या अपघातात दिगंबर चंद्रकांत इंगळे (वय ३२, रा. हरणखेड, ता. मलकापूर), मयूर निवास होले (वय २४, रा. हरणखेड) आणि परेश सुरेश घुले (वय १७, रा. घाणखेड, ता. बोदवड, जि. जळगाव) यांचा मृत्यू झाला आहे. दरम्यान, अपघातामुळे राष्ट्रीय महामार्ग क्रमांक ५६ वर नागपूरहून मुंबईकडे जाणारी वाहतूक काही काळासाठी ठप्प झाली होती. या घटनेने मृत तरुणांच्या कुटुंबीयांवर दुःखाचा डोंगर कोसळला आहे.

देवदर्शनाला जाणाऱ्या पुण्यातील कुटुंबावर काळाचा घाला

बेळगाव जिल्ह्याच्या गोकाक तालुक्यातील मालदिन्नी क्रॉसजवळ कार आणि ट्रकची समोरासमोर भीषण धडक होऊन अपघात घडला. यात चिमुकल्यासह एकाच कुटुंबातील तिघांचा जागीच मृत्यू झाल्याची दुर्दैवी घटना घडलीय. या दुर्घटनेनंतर स्थानिकांकडून हळहळ व्यक्त होत आहे. या अपघातात तिघेजण गंभीर जखमी झाले आहेत. ​

ओंकार चंद्रशेखर मांडरे (वय २६), रेश्मा मांडरे (वय ३२) आणि देवांश मांडरे (वय ४) अशी मृतांची नावे आहेत. या अपघाताची माहिती मिळताच गोकाक ग्रामीण पोलिसांनी घटनास्थळी धाव घेतली. पोलिसांनी पंचनामा करून पुढील तपास सुरू केलाय.