Ratnagiri : १६ सोमवार व्रताच्या उद्यापन कार्यक्रमावरून येताना भयंकर अपघात, २ जणांचा जागीच मृत्यू

Ratnagiri accident News Update : सोळा सोमवार व्रताच्या उद्यापन कार्यक्रमावरून घरी परत येताना भीषण अपघातामध्ये दोन जणांचा जागीच मृत्यू झाला आहे. रत्नागिरी जिल्ह्यात मंडणगड तालुक्यात आज पहाटे वॅगनार कारचा भीषण अपघात झाला. यामध्ये दोन जणांचा मृत्यू झाला, तर दोन जण जखमी झाले आहेत. शंकर करमरकर आणि हर्षदा जोशी यांचा मृत्यू झाला. प्रमोद मुकुंद लिमये आणि ओंकार प्रमोद लिमये हे दोन जण जखमी झाले आहेत. या अपघातानंतर रत्नागिरीत एकच खळबळ उडाली.

अपघाताची माहिती मिळताच स्थानिकांनी तात्काळ मदतकार्य केले. पोलिसांनाही याबाबतची माहिती मिळताच घटनास्थळी धाव घेत जखमींना रूग्णालयात दाखल केले. जखमींवर जवळच्या रूग्णालयात उपचार सुरू आहेत. पोलिसांनी अपघाताची नोंद केली आहे. पंचनामा झाल्यानंतर पोलिसांनी शंकर करमरकर आणि हर्षदा जोशी यांचे मृतदेह पोस्टमार्टमसाठी जवळच्या सरकारी रूग्णालयात पाठवले आहेत. अपघात का झाला? याबाबत पोलिसांकडून चौकशी करण्यात येत आहे. पोलिसांनी जखमींचे जबाब नोदवले आहेत.

१६ सोमवार व्रताच्या उद्यापन कार्यक्रमासाठी सर्वजण नाशिकला गेले होते. नातेवाईकांकडील व्रताच्या उद्यापन कार्यक्रम झाल्यानंतर सर्वजण दापोलीला परत येत असतानाच काळाने झडप घातली. घरी येताना मंडणगड शिरगाव परिसरात पहाटे भीषण अपघात झाला. यामधील दोन जखमींना तातडीने महाड येथील एका खासगी रुग्णालयात दाखल करण्यात आले आहे. पोलिसांनी तातडीने घटनास्थळी धाव घेतली पंचनामा झाल्यानंतर या अपघाताची नोंद केली.