PM Modi: मूर्तीची प्राणप्रतिष्ठा होईपर्यंत PM मोदींचे कठीण व्रत; पहाटे ३.४० वाजता करतात जप

Ayodhya:

अयोध्येतील राम मंदिरात प्रभू श्री रामाच्या मूर्तीचा प्राणप्रतिष्ठा सोहळा साजरा होण्यासाठी आता केवळ २ दिवस बाकी आहेत. प्राणप्रतिष्ठा होण्याआधी येथे व्रत करण्यास सुरूवात झाली आहे. मोदींनी यासाठी तब्बल ११ दिवासांचे व्रत केले आहे. यामध्ये ते जमिनीवर सतरंजी टाकून झोपतात अशी माहिती काही दिवसांपूर्वी समोर आली होती. अशात आता मोदी चक्क पहाटे ३.४० वाजता जप करण्यास सुरुवात करतात अशी माहिती समोर आलीये.

मिळालेल्या माहितीनुसार, पंतप्रधान मोदी रोज सकाळी ब्रह्म मुहूर्तावर १ तास ११ मिनिटे अध्यात्मिक कुशल साधूंकडून प्राप्त झालेल्या मंत्रांचा जप करतात. सलग ११ दिवस पहाटे ३.४० वाजता हा जप करण्याचा त्यांनी संकल्प केला आहे. ११ दिवस करण्यात येणाऱ्या व्रतातील हा सर्वात मोठा आणि विशेष पाठ असणार आहे.

हिंदू शास्त्रांमध्ये एखाद्या मूर्तीची प्राण प्रतिष्ठा करताना सर्व विधी पार पाडावे लागतात. हे विधी फार मोठे असतात. मूर्तीची प्राण प्रतिष्ठा होण्याआधीच नियमांचे पालन करण्यास सुरुवात करावी लागते. हे नियम फार कठीण असतात. त्यामुळे पंतप्रधान मोदी देखील आध्यात्मिक भावनेनं व्रत करत आहेत.

अयोध्येतील प्राणप्रतिष्ठा सोहळ्यासाठी देशाच्या कानाकोपऱ्यातून भाविक अयोध्येमध्ये दाखल झाले आहेत. यापैकी काही भाविक हे पायी, काही सायकलवर तर काही चक्क स्केटिंग करत अयोध्येमध्ये दाखल होत आहेत. देशात सध्या थंडीची लाट पसरली आहे. कडाक्याची थंडी असूनही भाविक रामलल्लाच्या दर्शनासाठी कसलीही तमा न बाळगता अयोध्येमध्ये दाखल झाले आहेत.