Raigad News: सावधान! महाडच्या जंगलात वाघांचा वावर? गुराख्यांनी ऐकल्या धडकी भरवणाऱ्या डरकाळ्या; वन विभागाकडून सर्व्हेची गरज

सचिन कदम, रायगड|ता. २५ ऑगस्ट २०२४

प्राणी प्रेमी, निसर्गप्रेमींसाठी रायगडमधुन एक मोठी बातमी आहे. रायगडमध्ये आजपर्यंत बिबट्याचे अस्तित्व दिसून आले आहे मात्र आता रायगडमध्ये वाघांचा वावर असल्याचेही समोर आले आहे. महाड तालुक्यातील तेलंगे या गाव परिसरातील जंगल भागात वाघाच्या डरकाळ्या ऐकायला येत आहेत, ज्यामुळे वन विभागाकडून सर्व्हे करण्याची गरज असल्याची मागणी होत आहे.

याबाबत सविस्तर माहिती अशी की, प्राणी प्रेमी, निसर्ग प्रेमीं करता रायगडमधुन एक मोठी बातमी आहे. रायगडमध्ये आजपर्यंत बिबट्याचे अस्तित्व दिसून आले आहे मात्र आता रायगडमध्ये वाघाचे असल्याचे समोर येत आहे. महाड तालुक्यातील तेलंगे या गाव परिसरातील जंगल भागात वाघाच्या डरकाळ्या ऐकायला येत आहेत. गुर चारण्यासाठी गेलेल्या गुराख्याने या डरकाळ्या सुरु असताना जंगलात केलेला व्हिडीओ व्हायरल होत आहे.

हा आवाज वाघाच्या डरकाळ्यांप्रमाणेच असल्याचे वन विभागाच्या अधिकाऱ्यांचे देखील म्हणणे आहे. महाडच्या खाडी पट्टयातील तेलंगे हे गाव रायगड आणि रत्नागिरी जिल्ह्याला जोडणाऱ्या सिमेवर आहे. या भागात दाट जंगलही आहे तर दोन वर्षा पूर्वी याच भागाला जोडून असणाऱ्या गोरेगाव म्हसळा रस्त्यावरील शिर्के ताम्हाणे गावात काही तरुणांनी वाघ बघितल्याचेही सांगितले होते.

दरम्यान, वन विभागाकडे रायगड, रत्नागिरीमध्ये वाघ नसल्याची नोंद असली तरी या घटनांमुळे रायगड रत्नागिरी जोडणाऱ्या या जंगल भागात वाघांसाठी सर्व्हे होणे गरजेचे झाले आहे. याबाबत आता वन विभाग काय पाऊले उचलणार? हे पाहणे महत्वाचे ठरणार आहे.