Raigad News: नेरुळमधून दोघे बेपत्ता, इस्टेट एजंचा मृतदेह सापडला; दुसरा अजूनही बेपत्ता

सचिन कदम, रायगड

नवी मुंबईच्या नेरूळ येथून बेपत्ता झालेल्या झालेल्या दोघांपैकी एकाचा मृतदेह सापडल्यामुळे खळबळ उडाली आहे. इस्टेट एजंटचा पेण-खोपोली मार्गावर मृतदेह आढळून आला. तर दुसरा अजूनही बेपत्ता आहे. दोघेही बेपत्ता झाल्याची पोलिस ठाण्यात तक्रार दाखल करण्यात आली होती. पोलिस त्यांचा शोध घेत होते. आज एकाचा मृतदेह आढळला तर दुसऱ्याचा पोलिस शोध घेत आहे.

मिळालेल्या माहितीनुसार, नवी मुंबईतून बेपत्ता असलेला इस्टेट एजंट सुमित जैन याचा मृतदेह पेण-खोपोली मार्गावर सापडल्याने एकच खळबळ उडाली आहे. गुरुवारी सुमित जैन याची कार मुंबई-पुणे एक्सप्रेस वेवर सापडली होती.या कारवर फायरिंग झाली होती. त्यामुळे बेपत्ता सुमित जैनचा तपास पोलिसांनी अधिक वेगाने सुरु केला.

तर पेण-खोपोली मार्गावर गागोदे गावाच्या हद्दीतील जंगल भागात सुमित जैन यांचा मृतदेह सापडला. सुमित जैन याच्यासोबत अमीर खान नावाची व्यक्ती देखील होती. अमीर खान बेपत्ता असल्याची तक्रार नेरूळ पोलिस ठाण्यात दाखल करण्यात आली होती. सुमित जैन यांचा मृतदेह सापडला. पण बेपत्ता असलेल्या अमिर खानच काय झालं? याचा तपास नेरूळ, खोपोली आणि पेण पोलिस करत आहेत.