Raigad News : आरोपीनं पोलीस कोठडीतच संपवलं आयुष्य, पत्नीची केली होती हत्या

राजेश भोस्तेकर

रोहा: पत्नीच्या हत्या प्रकरणी पोलीस कोठडीत असलेल्या आरोपीनं टोकाचं पाऊल उचललं. आरोपीनं पोलीस कोठडीतच गळफास घेऊन आत्महत्या केली. रोहा पोलीस ठाण्याच्या कोठडीत आज, गुरुवारी पहाटे ही घटना घडली.

रवींद्र वसंत वाघमारे (वय २५) असं आत्महत्या करणाऱ्या आरोपीचं नाव आहे. पत्नीच्या हत्या प्रकरणात तो रोहा पोलीस ठाण्याच्या कोठडीत होता. आज पहाटेच्या सुमारास त्यानं कोठडीतच गळफास घेऊन जीवन संपवलं. या घटनेनं रोहा पोलीस ठाण्यासह शहरात खळबळ माजली आहे. यानंतर जिल्हा पोलीस अधीक्षक अशोक दुधे हे रोहा पोलीस ठाण्यात पोहोचले. या आत्महत्या प्रकरणाचा तपास पोलिसांकडून सुरू आहे.

रोहा तालुक्यातील शेणवई गावातील आदिवासी वाडीवरील रवींद्र वाघमारे याने ९ एप्रिल रोजी पत्नी जयश्री वाघमारे हिची हत्या केली होती. स्वयंपाक करण्याच्या क्षुल्लक कारणावरून रवी याने जयश्रीची कोयत्याने वार करून हत्या केली होती. त्यानंतर तो फरार झाला होता. रोहा पोलिसांनी आरोपी रवींद्र याचा शोध घेऊन त्याला अटक केली होती. रोहा पोलीस ठाण्यात पोलीस कोठडीत रवीची रवानगी करण्यात आली होती. आज, १४ एप्रिल रोजी रवींद्र याने चादरीच्या साह्यानं गळफास घेऊन आत्महत्या केली. या घटनेची माहिती मिळताच पोलीस ठाण्यात खळबळ उडाली. या आत्महत्या प्रकरणात चौकशी सुरू केली असून, दोषींवर कारवाई केली जाणार असल्याचे जिल्हा पोलीस अधीक्षक अशोक दुधे यांनी सांगितले.