Hingoli Heavy Rain Flood : पावसाचा जोर वाढला, हिंगोलीत महापुरामुळे दोघांचा मृत्यू, मृतांच्या गावावर शोककळा

राज्यात गेल्या काही दिवसांपासून पावसाचा जोर वाढलेला आहे. सलग तीन ते चार दिवस झालेल्या मुसळधार पावसामुळे नद्या-नाल्यांना पूर आला असून अनेक ठिकाणी पाणी साचायला सुरुवात झाली आहे. ग्रामीण भागात पूर्जन्य परिस्थिती निर्माण झाली आहे. अशातच पुण्यातील हिंगोलीत आलेल्या महापुरामुळे आतापर्यंत दोघांचा बळी गेला आहे. यामध्ये एका शेतकऱ्यासह धबधब्यावर पोहण्यासाठी आलेल्या एका पर्यटकांचा समावेश आहे. या घटनेनंतर प्रशासनाने गावकऱ्यांना सतर्कतेचा इशारा दिला आहे.

नेमकं काय घडलं ?

मिळालेल्या माहितीनुसार शेतकरी धोंडीराम घोगरे काम करत असताना पाण्याच्या प्रचंड वेगात बुडाले. तर धबधब्यावर पोहण्यासाठी आलेले गोविंद लोंढे सेल्फी काढत असताना पाण्याचा अंदाज न आल्याने वाहून गेले असल्याचं समोर आले आहे. दोन्ही घटनांमुळे गावांमध्ये हळहळ व्यक्त होत आहे. अचानक आलेल्या पाण्याच्या प्रचंड लोंढ्याने लोकांना सावध केले आहे.

जिल्हाधिकारी काय म्हणाले ?

हिंगोलीचे जिल्हाधिकारी राहुल गुप्ता यांनी नागरिकांना सावधगिरी बाळगण्याचे आवाहन केले आहे. धोकादायक ठिकाणी प्रवास टाळावा, नद्या-नाल्यांजवळ जाणे टाळावे, तसेच पर्यटकांनी पावसाळ्यात धबधबे, घाट परिसर आणि नदीकाठावर जाताना विशेष काळजी घ्यावी, असे त्यांनी स्पष्ट केले आहे.

हवामान विभागाने येत्या काही दिवसांत पावसाचा जोर कायम राहील, असा इशारा दिल्याने प्रशासन सतर्क झाले आहे. गरज असेल तर घराबाहेर पडा असे प्रशासनाकडून आवाहन करण्यात आले आहे.