Pune : पुण्यातील शाळेत अश्लील डान्स, अंगविक्षेप करत तरुणीनं लगावले ठुमके, Video Viral

सागर आव्हाड, साम टीव्ही, प्रतिनिधी

Pune Viral Video : पुण्यातील मोरगाव येथील एक व्हिडीओ सोशल मीडियावर प्रचंड व्हायरल होत आहे. या व्हिडीओमध्ये एक तरुणी अंगविक्षेप करत लावणी सादर करत असल्याचे पाहायला मिळत आहे. हा व्हिडीओ एका विद्यालयाच्या प्रांगणात झालेल्या मनोरंजन कार्यक्रमाचा असल्याची माहिती समोर आली आहे.

मिळालेल्या माहितीनुसार, व्हायरल झालेला व्हिडीओ तीन महिन्यांपूर्वीचा आहे. हा व्हिडीओ बारामती तालुक्यातील मोरगाव येथील माध्यमिक आणि उच्च माध्यमिक विद्यालयाच्या प्रांगणात झालेल्या कार्यक्रमाचा आहे. या व्हिडीओवरुन टीका व्हायला सुरुवात झाल्यानंतर विद्यालयाच्या मुख्याध्यापकांनी स्पष्टीकरण दिले आहे.

गावपरंपरेनुसार, गेल्या अनेक वर्षांपासून विद्यालयाच्या प्रांगणात ग्रामदैवत भैरवनाथ यात्रेनिमित्त विविध मनोरंजनाचे कार्यक्रम शाळेच्या प्रांगणात घेतले जातात, त्या मनोरंजन कार्यक्रमातील हा व्हिडीओ आहे. यात विद्यालय आणि शैक्षणिक संस्थेचा कसलाही सहभाग नसल्याचे विद्यालयाचे मुख्याध्यापक अर्जुन कोकरे यांनी म्हटले आहे.

सालाबाद प्रमाणे यावर्षीही मोरगाव ग्रामस्थांचे ग्रामदैवत भैरवनाथ यात्रेनिमित्त यात्रा कमिटी यांच्या वतीने विविध मनोरंजनाच्या कार्यक्रमाचे आयोजन ६ ते ८ मे २०२५ यादरम्यान रोजी विद्यालयाच्या प्रांगणात केले होते. सदर कार्यक्रमाच्या वेळी मे महिन्यात शाळांना सुट्टी असल्याने विद्यालय बंद होते. त्यामुळे यात्रा कमिटी ग्रामस्थ मोरगाव यांच्या विनंती आणि मागणीवरून तोंडी परवानगी दिली गेली होती. या उत्सवात विद्यालय आणि विद्यालयाचे विद्यार्थी शिक्षक व कर्मचारी यांनी कसलाही सहभाग घेतला नव्हता असे स्पष्टीकरण विद्यालयाकडून सांगण्यात आले आहे.