राज्यात ट्रॅव्हल्स कंपन्यांकडून प्रवाशांची लूट; 'साम'च्या स्टिंग ऑपरेशनमध्ये लुटीचा पर्दाफाश

सणासुदीच्या काळात खाजगी ट्रॅव्हल्सचे दर वाढणं काही नवं नाही. रेल्वे, एसटीच्या बुकिंग फुल झाल्यानं लोकांना ट्रॅव्हल्सशिवाय पर्याय नसतो. मात्र, खासगी ट्रॅव्हल्सवर कुठलाही अंकुश नसल्यानं प्रवाशांची लूटमार सुरू झालीये. अशातच पुण्यातील लुटीचा पर्दाफाश साम टिव्हीनं केलाय. पाहूयात यावरचा स्पेशल रिपोर्ट.

हे तिकीट दर ऐकल्यावर ते खाजगी बसचे आहेत की विमानांचे.असा प्रश्न तुम्हाला पडला असेल. पण थांबा, हे दर खासगी बसेसचे आहेत. राज्यात सणासुदीच्या काळात रेल्वेबरोबरच खासगी बसमधून प्रवास करणाऱ्यांची संख्याही अधिक असते. याचाच गैरफायदा खासगी ट्रॅव्हल्स कंपन्या उचलत आहेत. विशेष म्हणजे, मनमानीपणे भाडे आकारणाऱ्या खासगी बसविरोधात आरटीओकडून विशेष तपासणी मोहीम सुरू असतानाही खाजगी बस कंपन्यांची बिनदिक्कतपणे लूट सुरूय. या लुटीचाच साम टिव्हीनं पर्दाफाश केलाय.

जर तुम्हाला दिवाळीसाठी पुण्याहून नागपूरला जायंच असेल तर 4200 रुपये मोजावे लागताहेत. तर पुण्याहून नागपूरला जाण्यासाठी नेहमीचा दर 1000 ते 1500 रुपये आहे. तसंच, पुण्याहून जळगावला जायंच असेल तर 1600 रुपये मोजावे लागताहेत. तर पुण्याहून जळगावला जाण्यासाठी नेहमीचा दर 900 ते 1000 रुपये इतका आहे.

ऐन सणासुदीत रेल्वे बुकींग फूल झाल्यानं आता खासगी ट्रॅव्हल्स अव्वाच्या सव्वा दर आकारत प्रवाशांचं अक्षरशः दिवाळं काढतायंत... मात्र, हा प्रकार दिवाळीतच नाही तर प्रत्येक सणासुदीत होत असतो. त्यामुळे सर्वसामान्यांच्या गरजेचा फायदा उचलणाऱ्या ट्रॅव्हल्स कंपन्यावर कधीतरी अंकुश लागणार का की आरटीओच्या नाकावर टिच्चून ही लूट अशीच सुरू राहणार.