एकीकडे राज ठाकरेंची भेट, दुसरीकडे उद्धव ठाकरेंना फोन; खासदारांनी सगळंच सांगितलं

आज सकाळपासूनच राज्यातील राजकीय घडामोडींना वेग आला आहे. मनसे अध्यक्ष राज ठाकरे यांनी मुख्यमंत्री देवेंद्र फडणवीस यांची वर्षा निवासस्थानी भेट घेतली. ही भेट जवळपास एका तासापर्यंत सुरू होती. दरम्यान, फडणवीसांनी माजी मुख्यमंत्री उद्धव ठाकरे यांना देखील फोन करून संवाद साधला. खासदार संजय राऊत यांनी दिलेल्या माहितीनुसार, उपराष्ट्रपती पदाच्या निवडणुकीच्या पार्श्वभूमीवर हा संपर्क झाला आहे. राज्यातील सर्वपक्षीय नेत्यांशी चर्चा करण्याची जबाबदारी फडणवीसांवर सोपवण्यात आली आहे.

मुख्यमंत्री फडणवीसांवर मोठी जबाबदारी

माजी उपराष्ट्रपती जगदीप धनखड यांनी राजीनामा दिल्यानंतर उपराष्ट्रपतीपद नेमकं कुणाला मिळणार, यासाठी रस्सीखेच सुरू आहे. दरम्यान, उपराष्ट्रपती पदाच्या निवडणुकीसाठी देवेंद्र फडणवीसांवर मोठी जबाबदारी सोपवण्यात आली आहे. राज्यातील सर्वपक्षीय नेत्यांशी फडणवीस चर्चा करणार आहेत. एनडीएच्या उमेदरवाराला पाठिंबा देण्याबाबत चर्चेची शक्यता आहे, अशी माहिती सुत्रांकडून मिळाली आहे.

देवेंद्र फडणवीस - राज ठाकरे भेटीवर राऊत काय म्हणाले?

राज ठाकरेंनी देवेंद्र फडणवीसांची भेट घेतली. या भेटीवर राजकीय वर्तुळात अनेक तर्क वितर्क लावण्यात येत आहे. यावर ठाकरे गटाचे खासदार संजय राऊत यांनी प्रतिक्रिया दिली आहे. 'विरोधी पक्षातील नेते भेटायला गेले आहेत. त्यांच्यात काही चर्चा झाली असेल तर होऊ द्या. राज ठाकरे हे अनेकदा देवेंद्र फडणवीस यांना भेटले आहेत. कदाचित आता ते गणपतीचं आमंत्रण द्यायला गेले असतील. यासह राज्यातील विविध प्रश्नांवर चर्चा सुरू असेल', असं राऊत म्हणाले.

राज ठाकरे फडणवीसांच्या भेटीला

आज राज ठाकरेंनी वर्षा निवासस्थानी मुख्यमंत्री देवेंद्र फडणवीसांची भेट घेतली. टाऊन पार्किंग संदर्भात फडणवीसांसोबत चर्चा झाली असल्याचं राज ठाकरे म्हणाले. मुंबई, पुण्यासह नाशिक आणि इतर शहरांमध्ये पार्किंगची समस्या आहेत. याबाबतचा आराखडा फडणवीसांना दिला असल्याचं राज ठाकरे म्हणाले. कबुतर, हत्तीण यात सगळे अडकले आहेत, टाऊन प्लॅनिंगसंदर्भात कुणी काही बोलत नाही, याबाबत आराखडा फडणवीसांना दिला असल्याचं राज ठाकरे म्हणाले.