मोदी - शहांनी घेतली राष्ट्रपतींची भेट; बड्या खासदारानं बॉम्ब फोडला, सप्टेंबर महिन्यात राजकीय भूकंप होणार?

दिल्लीत पावसाळी अधिवेशन सुरू असताना रविवारी पंतप्रधान नरेंद्र मोदी आणि गृहमंत्री अमित शहा यांनी राष्ट्रपती द्रौपदी मुर्मू यांची भेट घेतली. आधी पंतप्रधान नरेंद्र मोदींनी भेट घेतली. त्यानंतर गृहमंत्री अमित शहा यांनी राष्ट्रपतींची भेट घेतली. लागोपाठ झालेल्या भेटीमध्ये महत्वाच्या मुद्द्यांवर चर्चा झाली असल्याची शक्यता आहे. दरम्यान, या भेटी आणि चर्चांवरून शिवसेना ठाकरे गटाचे खासदार संजय राऊत यांनी मोठा दावा केला आहे.

भेट आणि महत्वाच्या बैठकांवर संजय राऊत म्हणाले, 'देशात राष्ट्रपतींचे काय अधिकार आहेत? हे आपल्याला ठाऊक आहे. राष्ट्रपतींच्या सल्ल्यानुसार सरकार किती काम करतं? हे पण आपल्याला ठाऊक आहे. आज राष्ट्रीय स्वयंसेवक संघाची महत्वाची बैठक आहे. माझ्या माहितीप्रमाणे या बैठकीतही भविष्यातील महत्वाच्या घडामोडींवर चर्चा होऊ शकते', असं राऊत म्हणाले.

यावेळी राऊतांनी मोठा दावा केला आहे. 'सप्टेंबर महिन्यांत राजकीय वर्तुळात मोठी घडामोड घडणार आहे. या देशात सप्टेंबर महिन्यात महत्वाच्या राजकीय घडामोडी घडू शकतात', असाही दावा त्यांनी यावेळी केला.

पंतप्रधान नरेंद्र मोदी, गृहमंत्री अमित शहा यांनी राष्ट्रपती द्रौपदी मुर्मू यांची भेट घेतली. या भेटीवर संजय राऊत यांनी प्रतिक्रिया दिली आहे. 'राष्ट्रपती द्रौपदी मुर्मू यांना पंतप्रधान भेटणे हा त्यांच्या कामाचा भाग आहे. ते राष्ट्रपरतींना भेटायला जातात हेच महत्वाचे आहे. सध्या एकंदरीत कामाची परिस्थिती पाहता, काहीही घडू शकते. पुढे काय घडतंय ते पाहू', असंही राऊत म्हणाले.