Cyber Crime : सीबीआय अधिकारी असल्याचे भासवत १ कोटीत फसवणूक; संशयिताला जयपूरमधून घेतले ताब्यात

पिंपरी चिंचवड : सीबीआय अधिकारी आणि बँक अधिकारी असल्याचे व्हॉटस्ॲप व्हिडिओ कॉलवर भासवून ६० वर्षीय जेष्ठ नागरिकाची फसवणूक करण्यात आली होती. पिंपरी चिंचवड पोलिसांच्या सायबर पोलिसांनी फसवणूक करणाऱ्या या आरोपीला जयपूरमधून ताब्यात घेतले आहे. 

पिंपरी चिंचवड (Pimpri Chinchwad) परिसरातील रहिवासी असलेल्या एका जेष्ठ नागरिकाला मनी लॉन्ड्रीगच्या अडीच कोटी रुपयांच्या फ्रॉड केसमध्ये अटक करण्याची भीती घालून फसवणूक केली. यात ज्येष्ठ नागरिकांच्या बँक खात्यातून १ कोटी ८ लाख रुपयांचा डिजिटल करन्सी चेक करून ती व्हेरिफाय करून परत करतो म्हणत आरोपीने पिंपरी चिंचवड शहरातील एका जेष्ठ नागरिकाची (Cyber Crime) फसवणूक केली होती. या प्रकरणी सायबर पोलिसात तक्रार दाखल करण्यात आली होती.  

तक्रारीनंतर सायबर पोलिसांनी मोठ्या शिताफीने मयंक अशोककुमार गोयल या आरोपीला राजस्थानच्या जयपूर शहरातून बेड्या ठोकल्या आहेत. या आधी देखील या फसवणुकीच्या गुन्ह्यात साहिल मुदलियार, क्षितिज क्षीरसागर आणि ओंकार नाईक यांना अटक करण्यात आली आहे. या बाबतचा अधिक तपास सायबर पोलीस करत आहेत.