तीन भावांची ‘आदर्श’ शेतवाटणी, अनोख्या शेतवाटणीची राज्यभरात चर्चा; कौटुंबिक बंध जपणारा निर्णय

सुप्रीम मस्कर, साम टिव्ही

परभणी : अनेक गावांमध्ये भाऊबंदकीमध्ये शेताच्या वाटणीवरुन एक-एक इंचावरून वाद असतो. कुठे कोर्ट तर कुठे भावाचा जीव घेण्यापर्यंत वाद विकोपाला जातो. अशा परिस्थितीत जमिनीपेक्षा नात्याला महत्त्व देत कौटुंबिक बंध जपणारी शेतवाटणी तीन भावांकडून करण्यात आलीय. परभणीतील गंगाखेड तालुक्यातील दहिफळे बंधूंनी आपल्या कृतीतून आदर्श घालून दिलाय.

रंगनाथराव दहिफळे यांच्या कुटुंबात ३ मुलं आणि १ मुलगी, नात असा मोठा परिवार आहे. मोठा मुलगा बाळासाहेब आणि लहान मुलगा युवराज हे दोघेही प्राध्यापक आहेत. मात्र मधला मुलगा केशव गावकडं शेती करतोय. त्यामुळे दहिफळे कुटुंबानं शेतीवाटणीचा निर्णय घेतल्यानंतर प्राध्यापक असणाऱ्या दोन्ही भावांनी नोकरी असल्याने जमिनीचा मोठा वाटा मधल्या भावाला दिला. त्यामुळे वडील रंगनाथराव यांना मुलांच्या या निर्णयानं फारच आनदं झालाय.

मुळात गावखेड्यातही आता एकत्रित कुटुंब पद्धती कमी प्रमाणात पाहायला मिळते. अशात दहिफळे कुटुंबाने एकत्रित कुटुंब पद्धती तर जपलीच शिवाय नात्यातील गोडवा कायम ठेवलाय. दहिफळे कुटुंबातील महिलांनीही या निर्णयाला मनापासून पाठींबा दिला. परभणीतील दहिफळे कुटुंबातील भावांची ही गोष्ट अनेकांसाठी आदर्शवत आहे. शेतकरी भावाच्या पाठिशी नोकरदार भाऊ असे भक्कमपणे उभे राहिल्यास ग्रामीण भागातलं चित्र नक्कीच बदलेल. दहिफळे कुटुंबाचा आदर्श 'जगात जर्मनी आणि महाराष्ट्रात परभणी' ही म्हण खरी करणारा ठरलीय.