Pandharpur News: पंढरपुरात गायब झालेल्या अल्पवयीन मुलीचा मृतदेह कालव्यात आढळला; वेळापूर पोलिस ठाण्यात ग्रामस्थांची गर्दी

Pandharpur News: पंढरपूर येथे इयत्ता पहिलीच्या वर्गातील गायब झालेल्या दिती चौगुले या सहा वर्षांच्या मुलीचा मृतदेह  श्रीपूर जवळ एका कालव्यात आढळून आला आहे.

या घटनेमुळे परिसरात एकच खळबळ उडाली आहे. या घटनेचा तपास करून आरोपीला तत्काळ अटक करावी‌, या मागणीसाठी खंडाळी येथील‌ ग्रामस्थांनी वेळापूर पोलिस ठाण्यात गर्दी केली आहे.

पहिलीच्या वर्गात शिकणारी सहा वर्षाची आदिती चौगुले ही 2 आॅगष्ट रोजी माळशिरस तालुक्यातील खंडाळी गावातील  शाळेतून गायब झाली होती.  या प्रकरणी वेळापूर पोलिस ठाण्यात शाळेच्या वतीने सोमनाथ पांडुरंग सगर यांनी फिर्याद दिली आहे. (Latest Marathi News)

दरम्यान, आज सायंकाळी गायब झालेल्या आदिती चौगुले या मुलीचा‌ मृतदेह  माळशिरस तालुक्यातील श्रीपूर येथील नीरा कालव्यात आढळून आला आहे. आदिती चौगुले ही मुलगी खंडाळी (दत्तनगर) येथील भाऊसाहेब राऊत विद्यामंदिर शाळेत इयत्ता पहिलीमध्ये शिकते. 2 आॅगष्ट रोजी ती  सकाळी नेहमीप्रमाणे शाळेत गेली होती.

दुपारच्या सुट्टीमध्ये आदितीने तिच्या मैत्रींसोबत जेवण केले.  जेवणानंतर घरी जाऊन येते, असे सांगून ती गेली होती. त्यानंतर आदिती शाळेत परत आलीच नाही. आज सायंकाळी तीचा मृतदेह आढळला आहे. या घटनेमुळे परिसरात एकच खळबळ उडाली असून पालकांमध्ये भीतीचे वातावरण पसरले आहे. या घटनेचा पोलिसांनी तपास सुरू केला आहे. मुलीच्या हत्याचे कारण अद्याप स्पष्ट झाले नाही.