Ashadhi Wari 2025 : आषाढी यात्रेसाठी १३ लाख बुंदी लाडूचा प्रसाद; मंदिर समितीची जोरदार तयारी

पंढरपूर : पंढरपूरच्या आषाढी यात्रेनिमित्ताने मोठ्या संख्येने भाविक पंढरपुरात येत असतात. त्यानुसार यंदाच्या आषाढी वारीसाठी किमान १२ ते १३ लाख भाविक येण्याचा अंदाज आहे. यामुळे विठूरायाच्या दर्शनाला येणाऱ्या भाविकांना मंदिर समितीकडून लाडू प्रसाद उपलब्ध करुन दिला आहे. याकरिता मंदिर समितीने १३ लाख ५० हजार बुंदी लाडू व ६० हजार राजगिरा लाडू प्रसादाची निर्मिती केली आहे.

वर्षभर आतुरतेने वारकरी मंडळी आषाढी वारीची वाट पाहत असतात. राज्यभरातून प्रमुख वाऱ्यांसह वेगवेगळ्या भागातून पायी दिंडी वारी पंढरपुरात दाखल होत असतात. यामुळे आषाढी एकादशीला पंढपुरात वैष्णवांचा मेळावा जमत असतो. लाखोंच्या संख्येने भाविक विठ्ठल दर्शनाला येत असतात. यंदाची आषाढी यात्रा आठवडाभरावर आली असून भाविक पंढरपूरमध्ये दाखल होऊ लागले आहे. या भाविकांसाठीची सर्व सुविधा मंदिर समितीकडून करण्यात आली आहे. 

लाडू प्रसादाची अल्प दरात विक्री
विठ्ठल रुक्मिणीचे दर्शन झाल्यानंतर भाविक देवाचा प्रसाद खरेदी करुन घरी घेऊन जातात. मंदिर समितीकडून भाविकांना बुंदी लाडू प्रसादाची अल्पदरात विक्री केली जाते. या लाडू प्रसादाला भाविकांनाकडून मोठी मागणी असते. मागणीनुसार यंदा भाविकांना लाडू प्रसाद उपलब्ध करुन देण्यात येणार आहे. त्यानुसार यंदा १३ लाख बुंदीचे लादून असणार आहेत. लाडू प्रसाद निर्मितीची तयारी सुरु आहे.

विठ्ठल मंदिरावर आकर्षक विद्युत रोषणाई
आषाढी यात्रेच्या निमित्ताने पंढरपूर येथील विठ्ठल रुक्मिणी मंदिरावर रंगीबेरंगी विद्युत दिव्यांची आकर्षक रोषणाई करण्यात आली आहे. दिव्यांच्या या प्रकाशाने विठ्ठल मंदिर व परिसर उजळून निघाला आहे. आषाढी यात्रेच्या सोहळ्याला आता सुरुवात झाली आहे. या निमित्ताने विठ्ठल मंदिरावरील शिखर, संत नामदेव पायरी, पश्चिम द्वार ,व्हीआयपी गेट, संत ज्ञानेश्वर दर्शन मंडप, तुकाराम भवनासह मंदिरातील विठ्ठल सभा मंडप यासह विविध ठिकाणी विविध रंगीबेरंगी दिव्यांची आकर्षक अशी विद्युत रोषणाई करण्यात आली आहे.