Palghar News : मित्रांसोबत पोहण्यासाठी गेलेल्या तरुणाचा बुडून मृत्यू; पालघरच्या अस्वाली धरणातील घटना

पालघर : मित्रांसोबत पालघरच्या अस्वाली धरणात पोहण्यासाठी गेलेल्या तरुणाचा बुडून मृत्यू झाल्याचे धक्कादायक घटना समोर आली आहे. घटनेची माहिती मिळताच स्थानिक नागरिक व पोलिसांनी सदर तरुणाचा मृतदेह शोधून बाहेर काढला.

पालघरमध्ये (Palghar News) मागील तीन दिवसांपासून मुसळधार पाऊस सुरू आहे. पावसामुळे सर्वत्र हिरवळ पसरली आहे. या दरम्यान चारही बाजूने जंगल असल्याने अस्वली धरणात तरुण निसर्गाच्या सानिध्यात आनंद लुटण्यासाठी मोठ्या प्रमाणावर येत असतात. मात्र या ठिकाणी कोणत्याही प्रकारचे सूचना फलक नसल्याने या धरणात अनेक वेळा अशा दुर्घटना घडून देखील प्रशासन याकडे दुर्लक्ष करत असल्याच चित्र आहे. अशीच घटना पुन्हा एकदा घडली आहे. 

दरम्यान तलासरीच्या बोरीगाव येथील मार्मिक कोळी (वय २६) हा आपल्या मित्रांसोबत धरणात पोहण्यासाठी गेला होता. मात्र धरणात उलटून वाहणाऱ्या पाण्यात पोहत असताना तो नदीच्या प्रवाहात वाहून गेला. या घटनेबाबत सोबत असलेल्या मित्रांनी गावात माहिती दिली. यानंतर स्थानिक त्यांच्या मदतीने काल उशिरा मार्मिक चा मृतदेह शोधण्यात पोलीस प्रशासनाला यश आले.