जमिनीचा वाद; भावाच्या डोक्यात कुऱ्हाडीने घाव घालून केला घात !

हिंगोली : राज्यात शेतजमिनीच्या वादात अनेकांचा जीव गेल्याच्या घटना घडल्या आहेत, अश्या घटना टाळण्यासाठी पोलीस, महसूल प्रशासनासह शासनाच्या अनेक यंत्रणा नेहमी प्रयत्नशील असतात. मात्र, अद्याप शेतीच्या वादातून जिवे मारण्याच्या घटना थांबलेल्या नाहीत. हिंगोली मध्ये शुक्रवारी मध्यरात्री तिघांनी आपल्याच २३ वर्षीय चुलत भावाला, शेतीच्या वादातून ठार केल्याची धक्कादायक घटना वसमत तालुक्यातील खांबाळा गावात घडली आहे.

हे देखील पहा -

या घटनेतील मयत युवकाचे नाव शेषराव होडगिर असे असून तो २३ वर्षाचा आहे. शेषराव नेहमी प्रमाणे शुक्रवारी संध्याकाळी आपल्या शेताकडे जात असताना, त्याच्याच चुलत भावांनी, त्याला अश्लील भाषेत शिवीगाळ करत, मारहाण करण्यास सुरुवात केली.

शेषराव ने त्यांना प्रतिकार केला. मात्र, तिघांनी मिळून त्याच्या डोक्यात कुऱ्हाडी ने घाव घालत त्याला जखमी केले. या घटनेची माहिती मिळताच गावकरी व कुटुंबांनी पोलिसांच्या मदतीने जखमी शेषराव याला नांदेड येथे उपचारासाठी दाखल केले. मात्र, डोक्यातून मोठ्या प्रमाणात रक्तस्त्राव झाल्याने शेषराव याचा मृत्यू झाला. पोलिसांनी या प्रकरणी गुन्हा दाखल केला आहे.

Edited By : Krushnarav Sathe