OBC Reservation: आरक्षण गेल्यावर मुलाला नोकरी कशी मिळणार?, ओबीसी आरक्षण बचावासाठी आणखी एकाची आत्महत्या

Summary -

1. धाराशिवमध्ये ओबीसी आरक्षण जाणार म्हणून एका व्यक्तीने आत्महत्या केली.

2. मुलाला नोकरी मिळणार नाही या भीतीने आणि आर्थिक अडचणींमुळे तो नैराश्येत गेला.

3. लातूर आणि बीडमध्येही ओबीसी आरक्षण वाचवण्यासाठी दोघांनी आत्महत्या केली होती.

4. शिक्षणाचा खर्च आणि शेतीतून मिळणाऱ्या उत्पन्नावर परिणाम होऊन ग्रामीण भागात अस्थिरता निर्माण झाली आहे.

मराठा समाजाला ओबीसीतून आरक्षण देण्याबाबत सरकारने सकारात्मक निर्णय घेतल्यानंतर ओबीसी समाज आक्रमक झाला आहे. त्यानंतर राज्यभरात ओबीसी समाजाची आंदोलने, मोर्चे आणि उपोषण सुरू झाले. राज्यात ओबीसी आरक्षणाच्या बचावासाठी तिसरी आत्महत्या झाल्याची घटना समोर आली आहे. आधी लातूर, नंतर बीड आणि आता धाराशिवमधील ओबीसी समाजातील एका व्यक्तीने आत्महत्या केली.

मिळालेल्या माहितीनुसार, धाराशिव जिल्ह्यामध्ये ५५ वर्षीय व्यक्तीने गळफास घेऊन आत्महत्या केली. ओबीसी आरक्षण जाणार म्हणून या व्यक्तीने आत्महत्या केल्याचा दावा नातेवाईकांनी केली. धाराशिवच्या वाशी तालुक्यातील सारोळा मांडवा गावात ही घटना घडली. माणिकराव डोईफोडे असे आत्महत्या केलेल्या व्यक्तीचे नाव आहे. आरक्षण गेल्यावर मुलाला नोकरी कशी मिळणार?, असा प्रश्न त्यांना पडला होता. या चिंतेतूनच त्यांनी आयुष्य संपवलं.

पुणे येथे असलेला उच्चशिक्षित मुलाला ओबीसी आरक्षण गेल्यावर नोकरी कशी लागणार या कारणासाठी आत्महत्या केल्याचा नातेवाईकांनी दावा केला आहे. माणिकराव डोईफोडे यांची हालाखीची परिस्थिती असल्याने मुलांच्या शिक्षणाचा खर्चही खूप झाला. ओबीसी आरक्षण, शिक्षणाचा खर्च आणि कोरडवाहू शेतीमधून उत्पन्न मिळत नसल्याने माणिकराव डोईफोडे निराश असल्याची नातेवाईकांनी माहिती दिली. वाशी पोलिसांकडून घटनास्थळाचा पंचनामा करून पुढील तपास सुरू केला आहे.

दरम्यान, लातूर जिल्ह्यातल्या रेणापूर येथे ओबीसी आरक्षण बचावासाठई आत्महत्या केली होती. त्यानंतर बीडच्या नाथापूर येथील एका व्यक्तीने गळफास घेत आत्महत्या केली. मुलगी पोलिस भरतीसाठी सराव करते आता मुलीचं काय होईल? या भीतीपोटी नैराश्येमध्ये येत त्यांनी आत्महत्या केली.