Pune News: हापूस घेताना फसवणूक होणार नाही, आता आंब्यांना लावणार QR कोड

उन्हाळा सुरु झाला आहे. आता आंब्याचा सीझन सुरु झाला आहे. कोकणातील हापूस आंबे आता बाजारात दाखल होतील. परंतु बाजारात फसवणूक सुरु आहे. कोकणातील हापूस आंबा जास्त किंमतीने विकला जात आहे. ही फसवणूक थांबावी म्हणून एक महत्त्वाचा निर्णय घेण्यात आला आहे.

महाराष्ट्रात सध्या आंब्याचा हंगाम सुरू झाला आहे.पुणेकरांना कोकणातील दर्जाचा आणि तोही बाजारातील किंमतीच्या तुलनेत स्वस्त मिळावा, या उद्देशाने पुणे जिल्हा परिषदेने पुढाकार घेतला आहे. या पुढाकारातून खास करुन पुणेकरांसाठी पुणे शहरातील गुलटेकडी येथील मार्केट यार्डमध्ये हा आंबा महोत्सव सुरू करण्यात आला आहे.

उत्पादक ते थेट ग्राहक उपक्रमांतर्गत हा महोत्सव दि. १ एप्रिलपासून सुरू करण्यात आला आहे. या आंबा महोत्सवात कोकणातील रत्नागिरी, सिंधुदुर्ग, रायगड, पालघर आणि ठाणे या पाच जिल्ह्यांमधील उत्तम दर्जाच्या आंब्यांची चव चाखता येणार आहे.

दरम्यान, या आंबा महोत्सवातच पुणे जिल्ह्यातील महिला बचत गटांंनी उत्पादित केलेल्या अस्सल गावरान वस्तूंची खरेदी आणि विविध पदार्थांची चवही चाखता येणार आहे. पुणे जिल्हा परिषद आणि राज्य कृषी पणन मंडळाच्या सहकार्याने मार्केट यार्ड येथे विक्री केंद्र असून यामध्ये एकूण 60 स्टॉल्स आहेत. यापैकी अनुक्रमे पहिले १५ स्टॉल्स हे उमेद अभियानांतर्गत बचत गटांच्या महिलांनी तयार केलेल्या वस्तु व पदार्थ विक्रीसाठी उपलब्ध करुन देण्यात आले आहेत.

बाजारात देवगड आंब्याच्या नावाखाली तुमची फसवणूक होत असते. मात्र, आता ही फसवणूक होणार नाही. कारण कृषी पणन विभागाने आंबा महोत्सवामध्ये प्रत्येक आंब्याला एक क्यूआर कोड दिलेला आहे. हा क्यूआर कोड तुम्हाला मदत करेल.