महाराष्ट्र-कर्नाटक सीमावाद : मंत्रालयात झाली बैठक, जयंत पाटील यांनी दिल्या 'या' सूचना

रश्मी पुराणीक

मुंबई : महाराष्ट्र-कर्नाटक सीमावादाबाबत (Maharashtra-karnatak border issue) सर्वोच्च न्यायालयात सुरू असलेल्या दाव्यासंदर्भातील कामकाजास गती देण्यासाठी आवश्यक त्या उपाययोजना कराव्यात, अशा सूचना जलसंपदा मंत्री आणि तज्ज्ञ समितीचे अध्यक्ष जयंत पाटील (Jayant Patil) यांनी आज दिल्या. महाराष्ट्र-कर्नाटक सीमा प्रश्नाच्या संदर्भात सर्वोच्च न्यायालयात दाखल केलेल्या याचिकेसाठी (Petition) तज्ज्ञ समितीची आज बैठक पार पडली.

मंत्रालयातील परिषद सभागृहात झालेल्या या बैठकीला सामान्य प्रशासन विभागाच्या अपर मुख्य सचिव तथा समितीच्या सदस्य सचिव सुजाता सौनिक, सदस्य ॲड. राम आपटे, दिनेश ओऊळकर, विशेष निमंत्रित ॲड. पाटील, ॲड. शिवाजी जाधव, ॲड.संतोष काकडे आदी उपस्थित होते. या बैठकीत जयंत पाटील यांनी उपस्थितांना सूचना दिल्या.

यावेळी बोलताना ते म्हणाले, सर्वोच्च न्यायालयातील दाव्याबाबत पूर्वतयारी करावी. आवश्यक असल्यास ज्येष्ठ विधीज्ञ नियुक्त करावे.ज्येष्ठ विधीज्ञांबरोबर चर्चा करण्यासाठी नवी दिल्लीतही बैठक घेण्यात यावी,अशी सूचनाही जयंत पाटील यांनी केली. यावेळी बैठकीत ॲड.शिवाजी जाधव यांनी सर्वोच्च न्यायालयातील दाव्याबाबतची वस्तुस्थिती सादर केली. सदस्य ॲड.र.वि.पाटील,दिनेश ओऊळकर,ॲड.राम आपटे यांनीही या बैठकीत मते मांडली.

Edited By - Naresh Shende