Ajit Pawar : 'उद्धव ठाकरेंना मुख्यमंत्रिपदावरून पायउतार करण्यात आलं, त्यामुळे...'; अजित पवारांचं शिवसैनिकांना आवाहन

Ajit Pawar News : चिंचवड विधानसभा पोटनिवडणुकीत जोरदार रणधुमाळी पाहायला मिळता आहे. या मतदारसंघातील नाना काटे यांच्या प्रचारासाठी महाविकास आघाडीकडून जय्यत तयारी केली आहे. या मतदारसंघातील महाविकास आघाडीचे उमदेवार नाना काटे यांच्या प्रचारार्थ संयुक्त मेळाव्यात राष्ट्रवादी काँग्रेसचे वरिष्ठ नेते अजित पवार यांनी शिवसैनिकांना आवाहन केलं आहे.

'उद्धव ठाकरेंना (Uddhav Thackeray) मुख्यमंत्रिपदावरून पायउतार करण्यात आलं. त्याचा बदला घेण्यासाठी शिवसैनिकांनो आपल्याला चिंचवड आणि कसबा निवडणूक जिंकायची आहे, असं आवाहन अजित पवार यांनी शिवसैनिकांना केलं.

चिंचवड विधानसभा पोटनिवडणुकीतील महाविकास आघाडीचे उमेदवार विठ्ठल ऊर्फ नाना काटे यांच्या प्रचारार्थ आज महाविकास आघाडीचे संयुक्त मेळावा आयोजित करण्यात आला आहे. राष्ट्रवादी काँग्रेसचे नेते अजित पवार, काँग्रेसचे प्रदेशाध्यक्ष नाना पटोले, शिवसेना नेते आमदार आदित्य ठाकरे, शिवसेनेचे पुणे जिल्हा संपर्कप्रमुख सचिन अहिर, आरपीआय खरात गटाचे अध्यक्ष सचिन खरात यांच्या प्रमुख उपस्थितीत हा मेळावा आयोजित करण्यात आला. या मेळाव्यात अजित पवार यांनी उपस्थितांना संबोधित केले.

अजित पवार (Ajit Pawar) म्हणाले, कोरोना काळात महाविकास आघाडी सरकारने राज्यात कामे केली, त्याची दखल न्यायालयाने देखील घेतली. कोरोना काळात इतक चांगलं काम महाविकास आघाडी सरकारने काम केलं होतं. परंतु जून महिन्यात एकनाथ शिंदे यांनी गद्दारी केली. त्यानंतर आपलं सरकार गेलं'.

शिवसेनेची बाळासाहेब ठाकरे यांनी स्थापना केली. बाळासाहेब ठाकरे यांच्या काळात देखील दोनदा बंड झालं. पण बंड झाल्यानंतर बंडखोर पुन्हा कधीच निवडून आले नाही. बाळासाहेब ठाकरेंनी शिवाजी पार्कवर सांगितलं होत की माझं वय झालं. माझ्या नंतर शिवसेनेची धुरा उद्धव ठाकरे सांभाळतील. असं बाळासाहेबांनी जाहीर केलं होतं, ही आठवण अजित पवार यांनी शिवसैनिकांना करून दिली.

'उद्धव ठाकरे यांना मुख्यमंत्रिपदावरून पायउतार करण्यात आलं, त्यामुळे त्याचा बदला घेण्यासाठी शिवसैनिकांनो आपल्याला चिंचवड आणि कसबा निवडणूक जिंकायची आहे, असं आवाहन अजित पवार यांनी शिवसैनिकांना केलं.