रोहिणी खडसेंवरील हल्ल्यानंतर जळगावात राष्ट्रवादी आक्रमक

जळगाव : राष्ट्रवादी कॉंग्रेसच्या रोहिणी खडसे खेवलकर यांच्यावर झालेल्या हल्ल्यानंतर जळगाव जिल्ह्यात राष्ट्रवादी काँग्रेस (NCP) आक्रमक झाली आहे. मुक्ताईनगर येथे राष्ट्रवादी काँग्रेसचे जिल्हाध्यक्ष रवींद्र भैया पाटील यांच्या नेतृत्वात खडसेंच्या निवासस्थानापासून पोलीस ठाण्यापर्यंत मोर्चा काढण्यात आला. पाेलिस ठाण्यात जोरदार घोषणाबाजी करत निदर्शने करण्यात आली तसेच संशयितांना तात्काळ अटक करा व कठोर कारवाईसाठी ठिय्या आंदोलनही करण्यात आले. घोषणांनी मुक्ताईनगर पोलीस ठाणे परिसर दणाणला होता. यावेळी पोलीस अधीक्षक डॉ प्रवीण मुंढे यांना निवेदन देण्यात आले.

24 तासांचा अल्टीमेटम

हल्ला करणार्‍यांना तात्काळ अटक करून त्यांच्यावर कठोर कारवाई करावी अशी जोरदार मागणी राष्ट्रवादी काँग्रेसतर्फे करण्यात आली. चोवीस तासांत संशयितांना अटक करावी अन्यथा मुक्ताईनगरात महामार्गावर तसेच मुख्य रस्त्यावर रास्ता रोको आंदोलन करण्यात येईल असा इशाराही राष्ट्रवादी काँग्रेसचे जिल्हाध्यक्ष रवींद्र पाटील यांनी दिला आहे. दरम्यान काल रात्री रोहिणी खडसे यांच्या गाडीवर हल्ला झाला होता. त्यानंतर मुक्ताईनगरमध्ये आणि संपुर्ण जळगावमध्ये कार्यकर्ते आक्रमक झाले आहेत. राज्य महिला आयोगाच्या अध्यक्षा रुपाली चाकणकर यांनीही कडक कारवाईची मागणी केली आहे.

Edited By: Pravin Dhamale