Yeola Vidhan Sabha : येवल्यात ठाकरे गटाची बंडखोरी; जिल्हाप्रमुख कुणाल दराडेंचा उमेदवारी अर्ज दाखल

अजय सोनवणे 
येवला (नाशिक) : येवला- लासलगाव मतदारसंघात ठाकरे गटाचे जिल्हाध्यक्ष कुणाल दराडे यांना पक्षाकडून तिकीट न मिळाल्याने ठाकरे गटातून बंडखोरी करत आज अपक्ष उमेदवारी अर्ज दाखल केला. यामुळे येवला मतदारसंघात देखील तिरंगी लढत होण्याची शक्यता निर्माण झाली आहे. 

ठाकरे गटाचे जिल्हाध्यक्ष कुणाल दराडे यांनी उमेदवारी अर्ज दाखल करण्यापूर्वी संवाद मेळाव्याचे आयोजन केले होते. यावेळी समर्थकांनी तुम्ही उमेदवारी अर्ज भरा; असा आग्रह केला असता कुणाल दराडे व परिवार भावुक झाल्याचे दिसून आले. समर्थकांच्या आग्रहाला मान देत कुणाल दराडे यांनी येवला- लासलगाव मतदार संघातून आज उमेदवारी अर्ज दाखल केला. अर्थात दराडे हे उमेदवारीसाठी इच्छुक होते. मात्र पक्षाकडून तिकीट न मिळाल्याने त्यांनी अपक्ष उमेदवारी केली आहे. 

महाविकास आघाडीकडून शरद पवार गटाचे माणिकराव शिंदे यांना उमेदवारी देण्यात आली. त्यामुळे कुणाल दराडे समर्थक नाराज असल्याने कुणालभाऊ तुम्हीच येवल्यातून उमेदवारी करा; अशी आग्रहाची विनंती समर्थकांकडून करण्यात आली होती. यानंतर दराडे यांनी ठाकरे गटातून बंडखोरी करत अपक्ष उमेदवारी अर्ज दाखल केला.