Shocking News : "तुला मिळवण्यासाठी मी स्मशानात..." जादूटोण्याच्या नावाखाली महिलेवर बलात्कार, नाशिकमधील धक्कादायक घटना

नाशिक मधून धक्कादायक बातमी समोर आली आहे. जादूटोण्याची भीती दाखवत एका भोंदू बाबाने महिलेवर लैंगिक अत्याचार केले आहेत. धक्कदायक म्हणजे याशिवाय या पीडित महिलेकडून ५० लाख उकळण्यात आले आहेत. याप्रकरणी पोलीस ठाण्यात भोंदूबाबा विरोधात तक्रार दाखल करण्यात आली असून त्याला अटक करण्यात आली आहे.

मिळालेल्या माहितीनुसार, गणेश जगताप या भोंदू बाबाचे नाव असून सदर घटना नाशिक मधील निफाडमध्ये घडली आहे. आरोपी हा स्वतःला भोंदू बाबा म्हणवून घेतो. त्याने महिलेला "तू मला आवडतेस, तुला मिळवण्यासाठी मी स्मशानात पूजा करतो," असे सांगून तिच्यावर मानसिक दबाव आणला. यानंतर त्याने एका पुस्तकात महिलेच्या पती आणि मुलांची नावे लिहिली आणि धमकावले की, "माझ्यासोबत शारीरिक संबंध ठेवले नाहीस तर पुस्तकातील नावांपैकी एकाचा बळी जाईल."

या जादूटोण्याच्या भीतीने घाबरलेल्या महिलेने आरोपीच्या सांगण्यानुसार अनेक वेळा शारीरिक संबंध ठेवले. याच दरम्यान, आरोपीने महिलेकडून ५० लाख रुपये उकळले आणि आर्थिक फसवणूक केली. यानंतर शारीरिक आणि मानसिक छळाला कंटाळलेल्या महिलेने पोलीस ठाणे गाठले.

पीडित महिलेने पोलीस ठाण्यात घडलेल्या प्रकरणाची तक्रार नोंदवली असून पोलिसांनी या प्रकरणी संबंधित कलमांखाली गुन्हा दाखल केला आहे. आरोपी गणेश जगताप याला अटक करण्यासाठी पोलिसांचे पथक रवाना झाले असून, त्याच्या साथीदारांचीही चौकशी सुरू आहे. महिलेने तक्रार दिल्यानंतर उघड झालेल्या या घटनेने स्थानिक भागात संतापाची लाट निर्माण झाली आहे. ग्रामीण भागात अंधश्रद्धा आणि भोंदूगिरीच्या नावाने होणाऱ्या अत्याचारांवर मोठ्या प्रमाणात वाढ झाली आहे.